خصوصی سرمایہ کاری کونسل دے تحت سرمایہ کاراں کوں سہولتاں ݙتیاں ویندیاں پئن ، خلیجی ملک پاکستان دے وݙے شراکت دار ہن، چین سی پیک تے پاکستان اچ ارباں ڈالر دی سرمایہ کاری کیتی اے ،وزیر خارجہ جلیل عباس جیلانی دا ”ٹی آر ٹی ورلڈ“ کوں خصوصی انٹرویو

اسلام آباد۔21ستمبر(اے پی پی) وزیر خارجہ جلیل عباس جیلانی آکھیے خصوصی سرمایہ کاری کونسل دے تحت سرمایہ کاراں کوں سہولتاں ݙتیاں ویندیاں پئن ، خلیجی ملک پاکستان دے وݙے شراکت دار ہن، چین سی پیک تے پاکستان اچ ارباں ڈالر دی سرمایہ کاری کیتی اے ،ساݙا بنیادی ہدف پاکستان اچ شفاف اتے غیر جانبدارانہ انتخابات کراوݨ اے ، معاشی مضبوطی سیاسی استحکام نال مشروط  اے، پاکستان دہشت گردی دے خلاف جنگ اچ بے پناہ قربانیاں ݙتن، پاکستان دی امن کوششاں تے بھارت منفی جواب ݙتے، سی پیک دے اڳلے مرحلے اچ زراعت اتے ریلوے تے توجہ ݙتی ویندی پئی اے ۔ اے ڳالھ انہاں ٹی آر ٹی ورلڈ کوں خصوصی انٹرویو اچ آکھی اے ۔ انہاں آکھیے پاکستان اچ سرمایہ کاری دے ٻہوں موقع ہن ۔ خصوصی سرمایہ کاری کونسل دا وݙا ہدف عالمی سرمایہ کاراں کوں راغب کرݨا اے ۔ انہاں آکھیے چین پاکستان دا ھک بہترین اتے قابل اعتماد دوست اے، چین سی پیک تے پاکستان اچ ارباں ڈالر دی سرمایہ کاری کیتی اے ۔  چین تے پاکستان سی پیک دی 10 ویں سالگرہ منیندے پئن ۔ وزیر خارجہ آکھیے عالمی منڈی اچ پٹرولیم مصنوعات دیاں قیمتاں ودھاوݨ نال ملک اچ انہاں دیاں قیمت اچ ودھ ڳئن ۔ وزیر خارجہ آکھیے ایس آئی سی ایف دے تحت 5 وݙے شعبیں اچ سرمایہ کاری دے ہدف مقرر کیتن ۔ وزیر خارجہ جلیل عباس جیلانی آکھیے پاکستان دہشت گردی دے خلاف جنگ اچ قربانیاں ݙتن، پاکستان اچ دہشت گرد گروپ ہمسایہ  ملکاں توں کارروائیاں اچ ملوث ہن، افغانستان کالعدم ٹی ٹی پی دے پاکستان اچ حملیں تے کارروائی کرے، افغانستان اپݨی سرزمین کہیں وی ملک دے خلاف استعمال نہ کرݨ کوں یقینی بݨاوے ۔ وزیر خارجہ جلیل عباس جیلانی آکھیے بھارت دے غیر قانونی زیر تسلط جموں و کشمیراچ انسانی حقوق دی سنگین خلاف ورزیاں تھیندیاں پئن ، عالمی برادری مسئلہ کشمیر کوں حل کرݨ سانگے آپݨا کردار نبھاوے ۔ وزیر خارجہ آکھیے جی سی سی ملک پاکستان دے زراعت، انفارمیشن ٹیکنالوجی، کاناں اتے معدنیات تے توانائی سودھے ٻئے شعبیں اچ دلچسپی رکھیندن ، کان کنی اتے توانائی اچ  جی سی سی ملکاں دلچسپی ݙکھائی اے انہاں آکھیے جتھاں تئیں سرمایہ کاری دے ماحول دا تعلق اے، مستقبل ٻہوں روشن نظر آندے ، اساں توقع کریندے پیوں جی سی سی ملکاں دے نمائندے اڄوکے مہینے پاکستان دا دورہ کریسن جیں اچ ٻہوں سارے معاہدیں اتے مفاہمت دی یادداشتاں تے دستخط تھیسن ۔ انہاں آکھیے پاکستان دا سعودی عرب، متحدہ عرب امارات، قطر اتے بحرین سودھے جی سی سی ملکاں نال اقتصادی، سیاسی، دفاعی اتے عوام وچال تعلقات دی مختلف جہتاں نال نیڑے دا تعاون اے ۔