جموں تے کشمیر تے اقوام متحدہ دی سلامتی کونسل دی قرارداداں تےعملدرآمد خطے دے امن کوں یقینی بݨاوݨ کیتے ضروری اے، وزیر خارجہ جلیل عباس جیلانی دا ”الجزیرہ“ کوں انٹرویو

اسلام آباد۔22ستمبر(اے پی پی) وزیر خارجہ جلیل عباس جیلانی آکھیے جموں تے کشمیر تے اقوام متحدہ دی سلامتی کونسل دی قرارداداں تےعملدرآمد خطے دے امن کوں یقینی بݨاوݨ تے پاکستان اتے بھارت وچال ہتھیاراں دی غیر ضروری بھج دھرک مکاوݨ کیتے ٻہوں ضروری اے ۔ نیویارک اچ اقوام متحدہ دی جنرل اسمبلی دے 78 ویں اجلاس دے موقع تے ”الجزیرہ“ ٹی وی کوں ݙتے ڳئے انٹرویو اچ وزیر خارجہ آکھیے انہاں قرارداداں تے عملدرآمد نہ تھیوݨ تے خطے اچ امن تے براہ راست اثر پمدا پئے۔ ایں توں انڄ پاکستان تے بھارت ݙوہیں دی ترقی اتے جنوبی ایشیائی ملکاں دے علاقائی تعاون دی تنظیم (سارک) وی متاثر تھیندی پئی اے ۔ انہاں آکھیے جو اقوام متحدہ دی سلامتی کونسل دیاں قرارداداں دے تناظر اچ کشمیر پاکستان اتے بھارت وچال ساریں توں اہم تے بنیادی مسئلہ اے جیں اچ کشمیریاں دیاں امنگاں موجب غیر جانبدارانہ استصواب رائے دا مطالبہ کیتا ڳئے۔ انہاں ایں ڳالھ تے  افسوس کیتے جو قرارداداں کوں 70 سال پہلے منظور تھیوݨ دے باوجود انہاں تے عملدرآمد نی تھیا ۔ انہاں نشاندہی کیتی جو کشمیر محاصرے وچ ہے تے وادی اچ ست لکھ توں ودھ بھارتی فوجی تعینات ہن، مقبوضہ کشمیر اچ لوکاں کوں انسانی حقوق دی بدترین خلاف ورزی دا سامݨا اے۔ کشمیر کوں انسانی جیل قرار ݙیندے ہوئیں انہاں آکھیے لوکاں کوں انہاں دے منصفانہ حقوق توں محروم رکھیا ویندا پئے تے کشمیری رہنماواں کوں بھارت نظر بند کر رکھیے۔ انہاں آکھیے پاکستان تے بھارت ایں جھیڑے تے جنگاں لڑ چکئن تے اے مسلسل کشیدگی دا باعث اے۔ وزیر خارجہ آکھیے جو اقوام متحدہ دی سلامتی کونسل دی ذمہ واری اے جو او اپݨی قرارداداں تے عمل درآمد کوں یقینی بݨاوے جیڑھا جو وݙے عرصے توں التوا دا شکار اے ۔ موسمیاتی تبدیلی دے تباہ کن اثرات بارے ڳالھ کریندے ہوئیں انہاں آکھیے اے پاکستان کیتے ھک ٻہوں وݙا چیلینج اے کیوں جو اے 10 ساریں توں ودھ منفی طور تے متاثرہ ملکاں اچ  شامل اہے۔ انہاں گزریل سال پاکستان دے تھیوݨ آلے بارے ضیان دا ذکر کیتا جیں اچ فصلاں، مال ڈھور اتے بنیادی ڈھانچے کوں تھیوݨ آلے ضیان توں انڄ 30 ملین لوک متاثر تھئن۔ وزیر خارجہ جلیل عباس جیلانی آکھیے اقوام متحدہ دے سیکرٹری جنرل موسمیاتی تباہی دے بعد مددگار کردار نبھائے اتے پاکستان سانڳے جنیوا اچ کانفرنس کراوݨ تے انہاں دا شکریہ ادا کیتے ۔