نگران وزیراعظم پاکستان انوار الحق کاکڑ دا اقوام متحدہ دی جنرل اسمبلی توں خطاب

نیو یارک۔22ستمبر(اے پی پی) نگران وزیراعظم پاکستان انوار الحق کاکڑ اقوام متحدہ دی جنرل اسمبلی توں خطاب کریندے ہوئیں آکھیے جو پاکستانی عوام تے حکومت ولوں کامیاب اجلاس کراوݨ تے مبارخ باد ݙینداں ، انہاں آپݨے خطاب اچ آکھیے جو موسمیاتی تبدیلی تے کورونا پاروں معاشی بحران تھیا انہاں آکھیے موسمیاتی تبدیلی پاروں پاکستان ساریں توں ودھ متاثر تھئے ، چھل پاکستان دا بنیادی انفراسٹرکچر تباہ کرتے رکھ ݙتا ہئی ۔ موسمیاتی تبدیلی پاروں پاکستان کوں 30 ارب ڈالردا ضیان تھئےکہیں وی ملک دی ترقی سانگے معاشی استحکام ٻہوں ضروری اے ، انہاں آکھیے پاکستان اچ معاشی استحکام کیتے اقدامات کیتے ویندے پئن ، ترقی کرݨ سانگے امن ٻہوں ضروری اے۔ انہاں آکھیے جو معاشی طور تے مستحکم تھیوݨ کیتے دنیا کوں رل تے اقدامات کرݨ دی لوڑھ اے ۔ نگران وزیراعظم آکھیے جو دنیا کوں رل تے اقدامات کرݨ دی لوڑھ اے، دنیا اچ یوکرین سودھے 50 جہیں تے جنگ جیہی صورت حال اے ، دنیا اچ بھک تے غربت اچ ودھارا تھیندا پئے۔ وزیراعظم بیا آکھیے جو پاکستان خطے اچ سارے ہمسائیں نال چنڳے تعلقات چاہندے۔ انہاں آکھیے بھارت خطے اچ شدت پسندی دے رحجان کوں ودھیندا پئے۔انہاں آکھیے جو بھارت مقبوضہ کشمیر اچ انسانی حقوق دیاں سنگین خلاف ورزیاں کریندا پئے۔ مقبوضہ کشمیر اچ بھارتی فوج حریت رہنماواں کوں جیلاں اچ پیندی پئی اے ۔ بھارتی فوج مقبوضہ کشمیر اچ کشمیریاں دی نسل کشی کریندی پئی اے ۔بھارت مسلسل مقبوضہ کشمیر اچ اقوام متحدہ دیاں قرارداداں دی خلاف ورزی کریندا پئے، کشمیر اچ بھارتی حکومت 9 لکھ فوج تعینات کررکھی اے۔ نگران وزیراعظم دا بیا آکھنڑ ہا جو افغانستان دے امن نال خطے دا امن جڑیا ہویا اے، اتے افغانستان توں کالعدم ٹی ٹی پی تے داعش پاکستان اچ دہشت گردانہ حملے کریندے پئن اساں چاہندوں کابل انہاں حملیں کوں روکݨ اچ مدد کرے انہاں آکھیے جو افغانستان اچ انسانی امداد دا سلسلہ جاری رہݨا چاہیدے۔ وزیراعظم آپݨے خطاب اچ آکھیے پاکستان اقوام متحدہ اچ امن مشن اچ کئی ݙھاکیں توں خدمات کریندا  پئے۔پاکستان ہمیشہ اقوام متحدہ دے امن مشن اچ فوجی جواناں دی خدمات پیش کیتن ۔وزیراعظم آکھیے جو فلسطینی دھرتی تے وی دیر تئیں امن دا قیام ضروری اے۔ انہاں آکھیے اسلاموفوبیا دی وجہ توں دنیا اچ مسلماناں تے حملے کیتے ویندے پئن ، گزریل سال اقوام متحدہ اسلامو فوبیا دے حوالے نال قرارداد منظوری کیتی ہئی ، انہاں آکھیے پاکستان تے او آئی سی اسلاموفوبیا جیہے مسئلیں کوں عالمی سطح تے نشابر کیتے۔