پاکستان اُچی پہاڑی چوٹیاں، سوھݨی جھیلاں، سرسبز وادیاں، پراݨی تہذیباں اتے ثقافتی ورثے دی سرزمین اے، صدر ڈاکٹر عارف علوی دا سیاحت دے جڳ ݙیھاڑ تے سنیھا

اسلام آباد۔27ستمبر  (اے پی پی) صدر مملکت ڈاکٹر عارف علوی آکھیا جو پاکستان اُچی پہاڑی چوٹیاں، سوھݨی جھیلاں، سرسبز وادیاں، پراݨی تہذیباں اتے ثقافتی ورثے دی سرزمین اے۔ ایوان صدر پریس ونگ موجب صدرمملکت بدھ کوں سیاحت دے جڳ ݙیھاڑ تے آپݨے سنیھے اچ آکھیا جو میݙے کیتے اے خوشی دی ڳالھ اے جو اڄ اساں عالمی یومِ سیاحت 2023 منیندے پیوں۔ اڄ اساں خطے دی ترقی اتے خوشحالی اچ سیاحت دے شعبے دے کردار اتے صلاحیت کوں استعمال کرݨ دا عزم کریندوں۔ انہاں آکھیا جو ہر سال ستاوی ستمبر کوں اقوام متحدہ دی عالمی تنظیم برائے سیاحت (یو این ڈبلیو ٹی او) ولوں سیاحت دا جڳ ݙیھاڑ منایا وینداے۔ ایں ݙینھ کوں مناوݨ دا مقصد سیاحت دے شعبے دی اہمیت اتے اساݙے معاشرے تے اوندے اثرات بارے شعور ݙیوݨ اے۔ صدرمملکت آکھیا جو ایں سال دے یومِ سیاحت دا موضوع “سیاحت اتے ماحول دوست سرمایہ کاری” اے اتے اوندا مقصد سیاحت دے ودھارے اتے پائیدار ترقی کیتے ماحول دوست سرمایہ کاری دے امکانات کوں نشابر کریندے۔ صدر ڈاکٹر عارف علوی آکھیا جو اقوامِ متحدہ دی عالمی تنظیم برائے سیاحت عالمی یوم ِسیاحت دے موقع تے انسانیت، کرہ ِارض اتے خوشحالی کیتے ٻیا اتے بہتر سرمایہ کاری دی لوڑھ کوں اجاگر کریندی اے۔ صدر آکھیا جو اساں ہک بہتر اتے پائیدار مستقبل کیتے ماحول دوست سرمایہ کاری تے توجہ ݙے تے پائیدار سیاحت دے امکانات کوں استعمال کر تے رل تے کم کروں۔