ساݙی ثقافت کوں ساریں توں ودھ ضیان نوآبادیاتی نظام پڄائے، ڈاکٹر نجیبہ عارف

اسلام آباد۔13اکتوبر(اے پی پی) اکادمی ادیبات دی صدر نشین ڈاکٹر نجیبہ عارف آکھیے ساݙی ثقافت کوں ساریں توں ودھ ضیان نوآبادیاتی نظام پڄائے، ثقافت ساݙی سنڄاݨ ہوندی اے ، قدیم اتے جدید ثقافت اچ اساکوں جیڑھی چیز چنڳی لڳے اینکوں اپنایا ونڄے ۔ جمعہ کوں انفارمیشن سروسز اکیڈمی اچ منعقدہ سیمینار توں خطاب کریندے ہوئیں انہاں آکھیے ھک زمانہ ہئی آپݨے آپ کوں مارڈرن اتے مہذب ظاہر کرݨ سانڳے اساں آپݨی ثقافت کوں لکاوݨ دی کوشش کریندے ہاسے ۔ انہاں آکھیے ثقافت ساݙی سنڄاݨ ہوندی اے ، ثقافت ویلھے دے نال نال بدلدی رہندی اے لیکن ایندیاں پاڑاں قائم رہندن، ثقافت ھک وݨ وانڳوں اے ، وݨ دے پن تے لڑیاں ہر سال بدلدے رہندن لیکن او پاڑاں قائم رہندن ۔ انہاں آکھیے ساݙی ثقافت کوں ساریں توں ودھ ضیان نوآبادیاتی نظام پڄائے ، جے اساں آپݨی ثقافت نال جڑیے رہندے تاں اڄ ساݙے ٻال اساں توں سوال نہ کریندے تے نہ ہی اساں وچال کوئی اختلاف ہوندا۔ ڈاکٹر نجیبہ عارف آکھیے قدیم تے جدید ثقافت ݙو رستے ہن تے اساں انہاں ݙوہیں دڳ تے ٹرݨ دی کوشش کریندوں اساکوں چاہیدے جو جئیں دی جیڑھی چیز چنڳی لڳے اینکوں اپنایا ونڄے ۔ انہاں آکھیے اے دنیا ھک منڈی اے تے ایں منڈی اچ ہر چیز دی قدر ہوندی اے جیڑھی وک سڳے اساں آپݨے آپ کوں ایں منڈی اچ بہتر قیمت لاوݨ سانڳے تیار کریندے رہ ویندوں ۔ انہاں آکھیے جو موجودہ دور اچ اساں ھک ڈسپوزیبل کلچر آلے پاسے ویندے پیوں جیڑھا جو ٻہوں خطرناک اے، اساکوں آپݨی ثقافت نال جڑیے رہݨا چاہیدے تے ایندے اچ ہی ساݙی بقا اے ، آپت اچ مکالمے دا ماحول پیدا کروں۔ لوک ورثہ دے سابق ڈائریکٹر جنرل، مصنف، ادیب عکسی مفتی سیمینار توں خطاب کریندے ہوئیں آکھیے پاکستان ثقافت دے لحاظ نال تضاد دا شکار اے ، اتھاں علاقائی ثقافتاں ہر چند کلومیٹر دے بعد بدل ویندن۔ انہاں آکھیے ساݙے اتے ایں ویلھے ففتھ جنریشن وار دی یلغار اے، اے ݙو عمارتاں بچاوݨ دا نی بلکہ آپݨے ذہناں کوں بچاوݨ دا اے ، ساݙے دشمن ساݙی ثقافت اتے اقدار تے وار کریندے پئن۔ انہاں آکھیے ساݙیاں حکومتاں معیشت دا راڳ الاپدیاں پئن لیکن جݙاں تئیں معیشت کوں ثقافت نال نہ رلیسوں مسئلے حل نہ تھیسن ۔ اساں آپݨا راستہ چھوڑ تے ݙوجھیں دے رستے تے ٹر پیوں اے تباہی دا راستہ اے۔ سیمینار دی صدارت ڈاکٹر سعدیہ کمال کیتی جݙاں جو معروف شاعرہ، ادیب ڈاکٹر صنوبر الطاف، ریحانہ شیخ اتے ڈاکٹر روشن ندیم وی سیمینار توں خطاب کیتا۔