غیر قانونی غیر ملکیاں کوں واپس ونڄݨا ہوسی ، ملک دی بہتری سانڳے اساکوں ذاتی مفادات کوں کنڈ پچھوں سٹݨا ہوسی ، نگراں وزیراعظم انوار الحق کاکڑ

پشاور۔13اکتوبر(اے پی پی) نگراں وزیراعظم انوار الحق کاکڑ آکھیے پاکستان دی سالمیت کیتے کہیں وی قربانی توں پچھوں نی ہٹݨا چاہیدا ، ملک دی بہتری سانڳے اساکوں ذاتی مفادات کوں کنڈ پچھوں سٹݨا ہوسی ، صوبہ خیبرپختونخوا دے مسئلیں دے حل سانڳے ہر ممکن تعاون کریسوں ، خیبرپختونخوا دے عوام دہشت گردی دا بہادری نال مقابلہ کیتے، شہداء دی قربانیاں کوں بھلا نی سڳدے ، افغانستان سودھے سارے ہمسائیں نال چنڳے تعلقات چاہندوں ، غیر قانونی غیر ملکیاں کوں واپس ونڄݨا ہوسی ۔ او دورہ پشاور دے موقع تے ایوان صنعت و تجارت دے وفد اتے میڈیا نال ڳالھ مہاڑ کریندے پئے ہن ۔ دورہ پشاور اچ پشاور چیمبر آف کامرس دی طرفوں نگراں وزیراعظم کوں روایتی پڳ پوائی ڳئی ۔ گورنر کے پی کے حاجی غلام علی نگراں وزیراعظم دا دورہ پشاور تے خیرمقدم کیتا۔ ایں موقع تے وفد نال ڳالھ مہاڑ کریندے ہوئیں انوار الحق کاکڑ آکھیے اردو ساݙی قومی زبان اے جئیں دی وجہ توں ساریاں قوماں جڑیاں ہوئیاں ہن ، پاکستان دی ساری مقامی زباناں ساݙیاں ہن ، پشاور میکوں آپݨے گھر وانڳوں لڳدے ، خیبرپختونخوا اچ میݙے ٻہوں پراݨے یار ہن ، کیڈٹ کالج کوہاٹ اچ تعلیم دے دوران اتھاں جیڑھا آپݨا پن ملیا ایں پاروں اے صوبہ میں اندر رچ وس ڳئے ، خیبرپختونخوا دے لوکاں کوں وفاق پاکستان اچ ھک وکھرا مقام حاصل اے، انہاں اچ صداقت، جرأت اتے محنت کٹ کٹ تے بھری اے ،انہاں آکھیے صفوت غیور جیہے 90 ہزار پاکستانیاں اپݨی جاناں دا نذرانہ پیش کیتے، شہداء دی قربانیاں کوں بھال نی سڳدے انہاں رت ݙے تے تکمیل پاکستان اچ آپݨا کردار نبھائے ، انہاں آکھیے ضم تھیوݨ آلے ضلعیں دے مسئلے دورہ چین دے بعد ذمہ واراں نال ملاقات کرتے انہاں دے مسئلے حل کریسوں ۔ ھک سوال دے جواب اچ وزیراعظم آکھیے تحریک طالبان پاکستان توں کہیں قسم دے مذاکرات نہ تھیسن او نشوم لوکاں کوں نشانہ بݨیندے پئن تے ریاست پاکستان انہاں دے خلاف کاروائی کریندی پئی اے دہشت گردی منڈھوں مکاوݨ سانڳے پرعزم ہیسے۔ غیر قانونی افغان مہاجرین دی وطن واپسی دے حوالے نال سوال دا جواب ݙیندے ہوئیں انہاں آکھیے 17 لکھ رجسٹرڈ افغان پاکستان اچ رہندے پئن ، انہاں کوں واپس نی بھیڄا ویندا پیا تاں جو غیر قانونی رہݨ آلے لوکاں کوں آپݨے ملک واپس ونڄݨا ہوسی ، افغانستان نال سفارتی آداب دے مطابق چنڳے تعلقات چاہندوں جتھاں ویزا اتے سفری دستاویزات دے تحت ہی لوک ݙوجھے ملک ونڄ سڳن۔ ھک سوال دے جواب اچ انہاں آکھیے نواز شریف عدالتی فیصلے تحت ٻاہرلے ملک ڳئے او واپس آسن تاں قانون دے مطابق نگراں حکومت عمل کریسی ، الیکشن کمیشن انتخابات کیتے جیں تاریخ دا تعین کریسی ایں مطابق آپݨی تیاری مکل کریسوں۔