سلامتی کونسل کوں انسانی تباہی دا سبب بݨݨ آلی بمباری اتے ناکہ بندی کوں وختی طور تے مکاوݨ سانڳے آپݨا مقررہ کردار ادا کرݨا چاہیدے، ترجمان دفتر خارجہ ممتاز زہرہ بلوچ دی ہفتہ وار پریس بریفنگ

اسلام آباد۔19اکتوبر(اے پی پی) پاکستان اقوام متحدہ دی سلامتی کونسل (یو این ایس سی) دے ٻدھ کوں تھیوݨ آلے ہنگامی اجلاس دے نتیجے تے مایوسی دا اظہار کریندے ہوئیں غزہ تے بمباری اتے غیر انسانی ناکہ بندی کوں وختی طور تے مکاوݨ دا مطالبہ کیتے۔  دفتر خارجہ دی ترجمان ممتاز زہرہ بلوچ خمیس کوں اپݨی ہفتہ وار پریس بریفنگ اچ آکھیے جو سلامتی کونسل کوں انسانی تباہی دا سبب بݨݨ آلی بمباری اتے ناکہ بندی کوں فوری طور تے ختم کرݨ سانڳے آپݨا مقررہ کردار ادا کرݨا چاہیدے۔ ترجمان اقوام متحدہ دی سلامتی کونسل اچ اسرائیل توں غزہ دی پٹی اچ داخلے دی اجازت ݙیوݨ ، لڑائی اچ وقفہ اتے شہریاں دے اتھوں نکلݨ دے حکم کوں ختم کرݨ دی قرارداد تےامریکہ دی طرفوں ویٹو پاور دے استعمال دا حوالہ ݙتا۔  اے اجلاس چین، روس اتے متحدہ عرب امارات غزہ دی وگڑدی ہوئی صورتحال تے ڳالھ مہاڑ سانڳے سݙیا ہئی ۔  برازیل دی طرفوں پیش کیتی ڳئی قرارداد کوں وسیع حمایت حاصل ہئی تے ایندے اچ شہریاں دے خلاف ہر قسم دے تشدد دی مذمت وی کیتی ڳئی ۔  15 رکنی کونسل اچ ھک (امریکہ) دے مقابلے اچ 12 ووٹ پئن جݙاں جو روس اتے چین ووٹنگ اچ حصہ نی ڳھدا ۔  انہاں آکھیے پاکستان کشیدگی تے یقین نی رکھیندا بلکہ جنگ بندی اتے دشمنی دا خاتمہ چاہندے تے عالمی برادری تے زور ݙتے جو او امن کوں یقینی بݨاوݨ سانڳے رل تے کم کرے ، ایں سوال تے کیا پاکستان کہیں مینڈیٹ دے تحت اسرائیل دے خلاف جنگ نی بلکہ قیام امن سانڳے آپݨیاں فوجاں فلسطین بھیجݨ دا ارادہ رکھیندے دے جواب اچ ترجمان آکھیے پاکستان دا ایجھا کوئی منصوبہ کائنی۔  انہاں آکھیے پاکستان دا موقف پرامن اے اتے اوں کفاہیں کہیں ملک نال جنگ شروع نی کیتی تے مسئلے دے حل سانڳے ڳالھ مہاڑ تے زور ݙتے ،۔ انہاں غزہ اچ اسرائیلی ظلم بالخصوص ہسپتال تے اڄوکے حملے تے پاکستان دی مذمت دا اعادہ کیتے۔ ۔ ترجمان میڈیا کوں ݙسائے جو فلسطینیاں سانڳے ھک چارٹرڈ طیارہ 100 ٹن انسانی امداد بشمول طبی سامان، خیمے اتے کمبل گھن تے مصر روانہ تھیسی۔ انہاں میڈیا کوں ݙسائے جو پاکستان توں غیر قانونی غیر ملکی شہریاں دی وطن واپسی دے موضوع تے سفارتی کور کیتے ھک بریفنگ سیشن منعقد کیتا ڳئے ۔  انہاں آکھیے ہراساں کرݨ دے واقعات کوں روکݨ سانڳے ھک ادارہ جاتی طریقہ کار تیار کیتا ڳئے تے شکایتاں دے ازالے کیتے ھک ہیلپ لائن وی بݨائی ڳئی اے۔  31 اکتوبر دی آخری تاریخ اچ کہیں وی توسیع بارے پچھیے ونڄݨ تے انہاں آکھیے حکومت کنے ایجھا کوئی وی فیصلہ کرݨ دا اختیار اے ۔  ٻدھ کوں جدہ اچ غزہ دے معاملے تے تھیوݨ آلے او آئی سی دے وزارتی اجلاس بارے ترجمان ممتاز بلوچ آکھیے مشترکہ اعلامیہ رکن ملکاں وچال اتفاق رائے دی عکاسی کریندے ۔  تریجھے بیلٹ اینڈ روڈ فورم اچ شرکت سانڳے وزیر اعظم انوار الحق کاکڑ دے چین دے جاری دورے دا حوالہ ݙیندے ہوئیں انہاں آکھیے اے دورہ سی پیک دے ݙھاکے دے جشن دی مناسبت نال اے ، چینی قیادت نال ملاقات، تقریب اچ شریک ٻئے رہنماواں نال ملاقات اتے تھنک ٹینکس اتے میڈیا نال ڳالھ مہاڑ ایں دورے دا حصہ ہن ۔