مسافراں اتے مال بردار ریل ڳاݙیاں دی آمدݨ اچ 17 فیصد ودھارا ریکارڈ تھئے ، وفاقی وزیر ریلویز  شاہد اشرف تارڑ

اسلام آباد۔24اکتوبر(اے پی پی) وفاقی وزیر ریلویز  شاہد اشرف تارڑ آکھیے مسافراں اتے مال بردار ریل ڳاݙیاں دی آمدݨ اچ 17 فیصد ودھارا ریکارڈ تھئے۔اے ڳالھ انہاں ھک  اجلاس دی صدارت کریندے ہوئیں آکھی اے ۔ جیں اچ پاکستان ریلویز دی کارکردگی، آپریشنل اتے انتظامی امور دا جائزہ ڳھدا ڳئے ۔ایں موقع تے وفاقی وزیر آکھیے راولپنڈی ریلوے سٹیشن  کمرشلائزیشن ایکشن پلان ٹائم لائن نال وختی پیش کیتا ویسی ، ریلوے سٹیشن دی کمرشلائزیشن منصوبے کوں مرحلہ وار مکمل کیتا ویسی ۔ انہاں آکھیے جو ریلوے اچ ای آر پی دے نفاذ نال ریلوے اچ مالیاتی کارکردگی اچ بہتری آئی اے، ریلوے اچ ایندھن دی استعداد کار ودھاوݨ سانڳے آن لائن فیول مینجمنٹ سسٹم کوں ترجیحی بنیاداں تے نافذ کیتا ویسی ۔  وفاقی وزیر مسافر تے مال بردار ریل ڳاݙیاں دی آمدݨ اچ 17 فیصد ودھارے تے ریلوے ٹیم دی تعریف کیتی ۔ اجلاس اچ ساری کیٹیگری اے دے ریلوے سٹیشناں تے بی او ٹی دی بنیاد تے ایگزیکٹیو ٹوائلٹس بݨاوݨ دا فیصلہ وی کیتا ڳئے ۔