ڈیووس۔17جنوری (اے پی پی) نگران وزیراعظم انوارالحق کاکڑ آکھیا جو پاکستان اچ عام انتخابات دی تیاریاں جاری ہن، عوام 8 فروری کوں آندے پنج سالیں کیتے حکومت چݨسن۔ معیشت دی بحالی پہلی ترجیح اے، اقتصادی اصلاحات ٻہوں ضروری ہن، پاکستان اچ کہیں کوں سیاسی وجوہات تے جیل اچ نی سٹیا ڳئیا، انتشار کھنڈاوݨ اتے ہنگامیاں اچ ملوث عناصر قانون اتے عدالتاں دا سامݨا کریندے پئن۔ اے ڳالھیں انہاں عالمی اقتصادی فورم اچ شرکت دے موقع تے “سی این بی سی” کوں ݙتے ڳئے انٹرویو اچ آکھی۔ نگران وزیراعظم انوار الحق کاکڑ ہک سوال دے ولدے اچ آکھیا جو الیکشن کمیشن آندے انتخابات کیتے آئینی تقاضے پورے کیتن۔ پاکستان اچ عام انتخابات دی تیاریاں جاری ہن۔ انہاں آکھیا جو پاکستانی عوام کوں انتخابات اچ ووٹ پاوݨ دا موقع ݙیوݨ اساݙی ذمہ واری اے۔ ہک سیاسی رہنما دے جیل اچ ہووݨ بارے سوال دے ولدے اچ انہاں آکھیا جو پاکستان اچ سیاسی آزادی اے، کہیں سیاسی جماعت دا رہنما آپݨے سیاسی رائے یا خیالات پاروں جیل اچ کائنی، جیڑھے لوک جیل اچ ہن او انتشار اتے ہنگامیاں اچ ملوث ہن، کہیں وی مستحکم جمہوری ملک اچ ہنگامے اتے انتشار قابل برداشت نی ہوندا۔ قانون اتے نظام انصاف آپݨا راہ ݙیکھسی۔ پاکستان اچ عام انتخابات دی تیاریاں جاری ہن، عوام 8 فروری کوں آندے پنج سالیں کیتے حکومت چݨسن۔
