انتخابات اچ عوام دے فیصلے دی تکمیل کیتے قومی اسمبلی دا اجلاس تیکھے سݙیا ویسی، نویں حکومت دے اڳو ٻہوں وݙے چیلنجز ہوسن، مرتضیٰ سولنگی

اسلام آباد۔16فروری(اے پی پی):نگران وفاقی وزیر اطلاعات، نشریات و پارلیمانی امور مرتضیٰ سولنگی آکھیے جو انتخابات اچ عوام دے فیصلے دی تکمیل کیتے قومی اسمبلی دا اجلاس تیکھے سݙیا ویسی، نویں حکومت دے اڳو ٻہوں وݙے چیلنجز ہوسن، نشریات بارے جدید رجحانات دا سوچݨ ساݙی کٹھی ذمہ داری اے۔ اے ڳالھ انہاں اسلام آباد اچ پاکستان ٹیلی ویژن کارپوریشن دے نیوز لیٹر دے اجراء دی تقریب نال خطاب اچ آکھی۔ تقریب اچ وفاقی سیکریٹری اطلاعات شاہیرہ شاہد، ایم ڈی پی ٹی وی مبشر توقیر شاہ اتے وزارت اطلاعات دے اعلیٰ افسران موجود ہن۔ نگران وفاقی وزیر اطلاعات آکھیا جو ہک نشریاتی ادارے دا نیوز لیٹر جاری کرݨ قابل تعریف اے، ڄیویں اڄ اساں ڈیجیٹل دور اچ ویندے پئے ہیں ایندے چیلنجز وی اویں وݙے ہین، آرٹیفیشل انٹیلی جنس، ڈیپ فیک، وائس کلوننگ ڄھیں مسلے سامݨے ہین، پی ٹی وی کوں اپݨا کل چنڳاں کرݨ کیتے جدید ٹیکنالوجیز تے توجہ ݙیندے ڈیجیٹل پراڈکٹس دا مقابلہ کرݨا ہوسی۔ انہاں آکھیا جو نگران دور اچ پاکستان ٹیلی ویژن ہک غیر جانبدار قومی نشریاتی ادارے دا کردار نبھائے، پاکستان دے عوام انتخابات اچ اپݨا فیصلہ ݙے ݙتے جیندے تے عمل کیتے تیکھے قومی اسمبلی دا اجلاس سݙیا ویسی جو حالی الیکشن کمیشن آف پاکستان کڄھ سرکاری نتائج جاری کرݨن۔ انہان آکھیا جو پی ٹی وی ریاست دا ترجمان ہووݨ دے نال نال عوام اتے عوامی مفادات دا وی ترجمان اے، بہتر کارکردگی، بہترین پی ٹی وی سکرین، بہترین پروگرام ہی عوام کون اعتماد ݙیسن۔