نگران وزیراعظم انوار الحق کاکڑ دی صدارت اچ وفاقی کابینہ دا اجلاس

اسلام آباد۔22فروری(اے پی پی) نگران وزیراعظم انوار الحق کاکڑ مختلف اداریں دی نویں سروں تنظیم ، ٻاہرلی سرمایہ کارے دے ودھارے تے کاروبار کوں سہولت ݙیوݨ دے حوالے نال نگران حکومت دے اقدامات تے اطمینان دا اظہار کریندے ہوئیں آکھیے جو اساں منتخب حکومت سانڳے ھک ایجھا لائحہ عمل ݙے تے ویندے پیوں جیڑھا یقینی طور تے عوام تے قومی مفاد سانڳے مفید ثابت تھیسی جݙاں جو کابینہ چیف آف آرمی اسٹاف جنرل سید عاصم منیرکوں پاکستان اتے ترکیہ دی مسلح افواج وچال تعاون دے حوالے نال انہاں دی خدمات دے اعزاز اچ حکومت ترکیہ دی طرفوں ”ٹرکش آرمڈ فورسز لیجئن آف میرٹ “ ایوارڈ وصول کرݨ دی منظوری ݙے ݙتی ۔ وزیراعظم آفس دے میڈیا ونگ توں جاری پریس ریلیز موجب نگران وزیراعظم انوار الحق کاکڑ دی صدارت اچ وفاقی کابینہ دا اجلاس اتھاں منعقد تھئے۔ایں موقع تے نگران وزیراعظم نگران حکومت دے تھوڑے عرصے اچ آپݨی کابینہ تے سول سرونٹس دی ودھ ساریاں کوششاں دی تعریف کریندے ہوئیں انہاں دا شکریہ ادا کیتے۔ نگران وزیراعظم آکھیے جو اساں ملکی معیشت کوں پہلے توں بہتر حالت اچ چھوڑ تے ویندے پئن ۔ نگران حکومت دے تھوڑے عررصے اچ کابینہ بہترین کارکردگی ݙکھائی۔ انہاں آکھیے اساں منتخب حکومت سانڳے ھک ایجھا لائحہ عمل ݙے تے ویندے پیوں جیڑھا یقینی طور تے عوام اتے قومی مفاد سانڳے فیدہ مند ثابت تھیسی ۔ نگران وزیراعظم آکھیے جو نگران حکومت دے سارے فیصلیں تے پالیسی سازی اچ ملکی مفاد کوں ہمیشہ اولین ترجیح ݙتی ڳئی۔  انہاں آکھیے اساکوں پاکستان دے ترقی و استحکام سانڳے رل تے کم کرݨا اے ۔وفاقی کابینہ مختلف اداریں دی تنظیم نو، ٻاہرلی سرمایہ کاری دے ودھارے تے کاروبار کوں سہولتاں ݙیوݨ دے حوالے نال نگران حکومت دے اقدامات تے اطمینان دا اظہار کیتے۔ کابینہ سیکرٹری وفاقی بیوروکریسی دی طرفوں وزیراعظم دی مدبرانہ قیادت دی تعریف کریندے ہوئیں ملک کوں پیش آندے اہم چیلنجز اچ تساݙی طرفوں ملکی مفاد اچ اہم اوکھے فیصلے کیتے ڳئن جنھاں دے ݙورس نتیجے نکلسن ۔ وفاقی کابینہ وزارتِ خزانہ دی سفارش تے لبنیٰ فاروق ملک دی ڈیپوٹیشن بطور ڈائریکٹر جنرل، فنانشل مانیٹرنگ یونٹ (ایف ایم یو) دی مدت اچ 9 جون 2023 توں 8 جون 2024 تئیں توسیع ݙیوݨ دی منظوری ݙتی۔ وفاقی کابینہ وزارت خارجہ دی سفارش تے چیف آف آرمی سٹاف جنرل سید عاصم منیر کوں پاکستان تے ترکیہ دی مسلح افواج وچال تعاون دے حوالے نال انہاں دی خدمات دے اعزاز اچ حکومت ترکیہ  دی طرفوں ”ترکش آرمڈ فورسز لیجئن آف میرٹ ‘‘ ایوارڈ وصول کرݨ دی اجازت ݙتی۔ وفاقی کابینہ وزارت قومی غذائی تحفظ و تحقیق دی سفارش تے وزارت قومی غذائی تحفظ و تحقیق ، حکومت پاکستان تے خلیفہ انٹرنیشنل ایوارڈ فار ڈیٹ پام اینڈ ایگریکلچر انوویشن ، متحدہ عرب امارات وچال مفاہمتی یادداشت تے دستخط دی منظوری ݙتی،وفاقی کابینہ اقتصادی رابطہ کمیٹی دے13  تے 14 فروری 2024 کوں تھیوݨ آلے اجلاساں اچ کیتے ڳئے فیصلیں دی توثیق کیتی۔ وفاقی کابینہ نے کابینہ کمیٹی حکومتی ملکیتی ادارہ جات16 فروری 2024 کوں تھیوݨ آلے اجلاس اچ کیتے ڳئے فیصلیں تے کابینہ کمیٹی برائے لیجسلیٹو کیسز دے 16 فروری 2024 کوں تھیوݨ آلے اجلاس اچ کیتے ڳئے فیصلیں دی وی توثیق کرݙتی۔