پنجاب اسمبلی دے نویں منتخب ارکان حلف چا ڳھدا

لاہور۔23فروری  (اے پی پی):عام انتخابات 2024 دے نتیجے اچ بݨݨ آلی پنجاب اسمبلی دے نویں منتخب ارکان بطور قانون ساز حلف چا ڳھدا ،اسپیکر سبطین خان ارکان اسمبلی توں حلف ڳھدا ،مسلم لیگ (ن) دی نامزد وزیراعلی مریم نواز شریف حلف چاوݨ سانڳے اسمبلی ہال پڄی تاں ارکان شیر شیر دے نعرے لاتے ،اجلاس اچ سنی اتحاد کونسل اتے (ن) لیگ دے ارکان اچ معمولی تلخ کلامی وی تھئی۔پنجاب اسمبلی دا افتتاحی اجلاس سویلے 10 وڄے سݙیا ڳیا ہئی جیڑھا 2   گھنٹے دیر نال اسپیکر سبطین خان دی صدارت اچ شروع تھیا ۔مسلم لیگ (ن) دی نامزد وزیراعلی مریم نواز حلف چاوݨ سانڳے اسمبلی حال اچ پڄاں۔ایوان اچ آمد تے میڈیا دے سوالاں دے جواب اچ مریم نواز آکھیے اللہ کرے پنجاب اچ خدمت دا ھک نواں دور شروع تھیا۔مسلم لیگ (ن)  دے 215 دے نیڑے اتے سنی اتحاد کونسل دے 98  ارکان ایوان اچ موجود ہن ۔ (ن) لیگی ارکان اسپیکر توں حلف گھنݨ دی استدعا کیتی،ایں دوران سنی اتحاد کونسل دے وزیراعلیٰ دے عہدے سانڳے نامزد امیدوار اسلم اقبال اسمبلی نہ پڄ سڳیے تاں جو اسپیکر بغیر حلف ڳھدے اجلاس اچ 45 منٹ دا وقفہ کرݙتا تے آکھیے جو سنی اتحاد کونسل دے نامزد  وزیراعلی اسلم اقبال دے پروڈکشن آرڈر جاری کریندا پیاں ۔اکثریتی ارکان کوں اسپیکر دے سڄے پاسوں نشستاں الاٹ کیتاں ڳیاں ۔نماز جمعہ دے وقفے دے بعد اجلاس ول شروع تھیا جیں اچ اسپیکر سبطین خان نویں منتخب ارکان اسمبلی توں حلف ڳھدا ۔حلف دے بعد ارکان ھک ݙوجھے کوں مبارخ ݙتیاں ۔حلف چاوݨ دے بعد ارکان اسمبلی گولڈن بک تے دستخط وی کیتن۔پنجاب اسمبلی دے313 توں ودھ ارکان حلف چاتا جنھاں اچ پاکستان مسلم لیگ (ن) اتے اتحادی جماعتاں دے  215 ارکان اسمبلی تے سنی اتحاد کونسل دے 98 ارکان  شامل ہن۔حلف گھنݨ آلیں اچ نامزد وزیر اعلی پنجاب مریم نواز اتے مریم اورنگزیب وی شامل ہن ۔پنجاب اسمبلی دا اجلاس ہفتہ چار وڄے تئیں ملتوی کرݙتا ڳئے۔