پاکستان پیپلزپارٹی دےسید اویس قادر شاہ سپیکرتے انتھونی نوید ڈپٹی سپیکر  سندھ اسمبلی منتخب

کراچی۔ 25 فروری (اے پی پی):پاکستان پیپلز پارٹی دے نامزد امیدوار سید اویس قادر شاہ  سپیکر اتے انتھونی نوید ڈپٹی سپیکر سندھ اسمبلی منتخب تھی ڳئن۔ سپیکر آغا سراج درانی دی صدارت اچ تھیوݨ آلے اجلاس دا باقاعدہ آغاز تلاوت کلام پاک نال تھیا جیں دے بعد سپیکر اسمبلی آغا سراج درانی نویں سپیکر تے ڈپٹی سپیکر سانڳے پینل آف اجلاس نامزد کیتا۔آغا سراج درانی شرجیل میمن، سعید غنی، ندا کھوڑو اتے علی خورشیدی کوں پینل آف اجلاس نامزد کیتا۔سپیکر اتے ڈپٹی سپیکر سندھ اسمبلی دا انتخاب خفیہ رائے شماری دے ذریعے تھیا ،ووٹنگ دا عمل مکمل تھیوݨ دے بعد گنتی کیتی ڳئی ۔ سپیکر آغا سراج درانی نتیجے دا اعلان کریندے ہوئیں سید اویس قادر شاہ 111 ووٹ گھن تے سپیکر منتخب تھی ڳئن جݙاں جو انہاں دے مقابلے اچ ایم کیو ایم دی امیدوار صوفیہ سعید شاہ 36 ووٹ ڳھدے ۔بعد اچ آغا سراج درانی سید اویس قادر شاہ  توں عہدے دا حلف ڳھدا جیں دے بعد انہاں آپݨی ذمے واریاں سنبھال ڳھدیاں ۔سید اویس قادر شاہ عام انتخابات اچ سکھر پی ایس 23 توں پیپلزپارٹی دے ٹکٹ تے رکن صوبائی  اسمبلی منتخب تھئےہن ۔ پیپلز پارٹی دے انتھونی نوید ڈپٹی سپیکر سندھ اسمبلی منتخب تھی ڳئن۔انتھونی نوید 111 ووٹ گھن تے ڈپٹی سپیکر سندھ اسمبلی منتخب تھئن جݙاں جو انہاں دے مقابلے اچ ایم کیو ایم دے نامزدامیدوار راشدخان کوں 36 ووٹ ملیے۔نویں منتخب سپیکر اویس شاہ ڈپٹی سپیکر انتھونی نوید توں عہدے دا حلف ڳھدا ۔