قائد ایوان کیتے نامزد امیدوار شہباز شریف اتے عمر ایوب خان دے کاغذات نامزدگی منظور

اسلام آباد۔2 مارچ(اے پی پی):قومی اسمبلی اچ قائد ایوان کیتے نامزد امیدوار شہباز شریف اتے عمر ایوب خان دے کاغذات نامزدگی منظور تھی ڳن۔ قومی اسمبلی سیکرٹریٹ موجب اسپیکر وزارتِ عظمیٰ کیتے کاغذات نامزدگی دی منظوری کاغذات دی مکمل جانچ پڑتال توں بعد ݙتی۔ ایں موقع تے ݙوہاں امیدواراں دے تجویز وتائید کنندگان موجود ہن۔ وزارت عظمیٰ دا انتخاب قومی اسمبلی دے آݙت کوں تھیوݨ آلے اجلاس اچ تھیسی۔ سینیٹر اسحاق ڈار، خورشید شاہ، رانا تنویر، احسن اقبال، خواجہ آصف، انوشہ رحمان، طارق بشیر چیمہ، عون چودھری اتحادی جماعتاں دے نامزد وزیراعظم شہبازشریف دے کاغذات جمع کرائن۔ ٻعے پاسو سنی اتحاد کونسل دے عمر ایوب دے کاغذات نامزدگی وی جمع کرائے ہن۔ سنی اتحاد کونسل دے اسد قیصر، علی محمد خان، عامر ڈوگر، جنید اکبر اپݨے امیدوار عمر ایوب دے کاغذات نامزدگی جمع کرائن۔