میر علی اچ دہشت گرداں دے سیکورٹی فورسز دی ھک چوکی تے حملے اچ 6 دہشت گرد جہنم واصل، ݙو افسرتے پنج جوان شہید

راولپنڈی۔16مارچ (اے پی پی):شمالی وزیرستان دے عمومی علاقے میر علی اچ دہشت گرداں دے سکیورٹی فورسز دی ھک چوکی تے حملے اچ 6 دہشت گرد جہنم واصل تھی ڳئن جݙاں جو جوانمردی نال حملے کوں ناکام بݨیندے ہوئیں سکیورٹی فورسز دے ݙو افسر اتے پنج جواناں جام شہادت نوش کیتے۔ پاک فوج دے شعبہ تعلقات عامہ (آئی ایس پی آر) توں جاری بیان موجب 16 مارچ 2024 کوں سویلے ، چھی دہشت گرداں دے ھک گروپ سیکورٹی فورسز دی ھک چوکی تے حملہ کیتے۔ساݙے فوجیاں دراندازی دی ابتدائی کوشش کوں ناکام بݨائے ، دہشت گرداں دھماکہ خیز مواد نال بھری ڳاݙی کوں چوکی نال ٹکرا ݙتا ۔ ایندے بعد ٻہوں سارے خودکش حملیں اچ عمارت دا ھک حصہ ڈھہہ ڳیا جیں دے نتیجے اچ سرزمین دے پنج بہادر پتر شہید تھی ڳئن ۔شہدا اچ حوالدار صابرساکن ضلع خیبر ، نائیک خورشید ساکن ضلع لکی مروت ، سپاہی ناصر ساکن ضلع پشاور ، سپاہی راجہ ساکن ضلع کوہاٹ اتے سپاہی سجاد ساکن ضلع ایبٹ آباد شامل ہن۔ کلیئرنس آپریشن دے دوران لیفٹیننٹ کرنل کاشف دی سربراہی اچ ساݙے دستیں موثر طریقے نال سارے چھی دہشت گرداں کوں جہنم واصل کر ݙتا۔ تاں جو شدید فائرنگ دے تبادلے اچ لیفٹیننٹ کرنل سید کاشف علی عمر39 سال ساکن کراچی اتے کیپٹن محمد احمد بدر،عمر23 سال،ساکن ضلع تلہ گنگ بہادری نال لڑدے ہوئے شہید تھی ڳئن۔ علاقے اچ موجود کہیں وی ݙوجھے دہشت گرد دے خاتمے سانڳے کلیئرنس آپریشن جاری اے ، پاکستان دی سکیورٹی فورسز ملک توں دہشت گردی دی لعنت کوں منڈھوں مکاوݨ سانڳے پرعزم ہن اتے ساݙے بہادر جواناں دیاں قربانیاں ساݙے عزم کوں ٻیا تکڑا کریندن ۔