پاکستان سودھے پوری دنیا اچ ٹی بی توں بچݨ دا جڳ ݙیھاڑ 24مارچ کوں منایا ویسی

اسلام آباد۔17مارچ (اے پی پی) پاکستان سودھے پوری دنیا اچ ٹی بی توں بچݨ دا جڳ ݙیھاڑ 24مارچ کوں منایا ویسی ۔ اے ݙینھ مناوݨ دا بنیادی مقصد عام آدمی کوں تپ دق (ٹی بی)دے مرض ، کھنڈݨ تے علاج معالجہ بارے آگاہی ݙیوݨ اے۔ پاکستان اچ ہر سال تپ دق دے 6 لکھ کیسز رپورٹ تھیندن ۔ جنھاں اچوں لڳ بھڳ 44 ہزارلوک انفیکشن توں مردن ۔تپ دق (ٹی بی) کوں کورونا دے بعد دنیا دی ݙوجھی ساریں توں مہلک متعدی بیماری سمجھیا ویندے ۔1700 دے ݙھاکے اچ مریضاں دے پیلے رنگ دی وجہ توں ٹی بی کوں “سفید طاعون” آکھیا ویندا ہئی جݙاں جو 24 مارچ 1882 کوں ڈاکٹر رابرٹ کوچ ٹی بی دا سبب بݨݨ آلے بیکٹیریا کوں دریافت کیتا ہئی تے تاں جو ھک صدی بعد ایں ݙینھ ٹی بی دا جڳ ݙیھاڑ مناوݨ دا آغاز تھیا ۔ تپ دق دے جڳ ݙیھاڑ دے موقع تے عام آدمی اچ شعور اجاگر کرݨ سانڳے سرکاری ، نجی و طبی اداریں دے زیر انتظام مختلف پروگرام تھیسن ۔