راولپنڈی۔26مارچ (اے پی پی):سکیورٹی فورسز تربت اچ پاک بحریہ دے ائیر بیس پی این ایس صدیق تے دہشتگرد حملے دی کوشش ناکام بݨا ݙتی اے ۔فورسز اثاثیں دی حفاظت یقینی بݨیندے ہوئیں وختی تے مؤثر جواب ݙتا۔آئی ایس پی آر موجب ائیربیس پی این ایس صدیق تربت تےحملہ 25 اتے 26 مارچ دی وچلی رات کیتا ڳئے، بحری دستیں دی مدد سانڳے نیڑے موجود سکیورٹی فورسز کوں وختی متحرک کیتا ڳئے ، مسلح افواج دے ہم آہنگ مؤثر جواب مشترکہ کلیئرنس آپریشن کیتا، مشترکہ کلیئرنس آپریشن اچ چارے دہشتگرداں کوں ہلاک کرݙتا ڳئے ۔ دہشتگرداں نال شدید فائرنگ دے تبادلے اچ ایف سی بلوچستان دے سپاہی نعمان فرید شہید تھئن، 24 سالہ سپاہی نعمان فرید شہید دا تعلق مظفرگڑھ توں اے ۔ علاقے اچ مزید کہیں دہشتگرد کوں مکاوݨ سانڳے کلیئرنس آپریشن جاری اے۔آئی ایس پی آر دا آکھݨ اے جو مسلح افواج ملک توں دہشتگردی دی لعنت ہرقیمت تے مکاوݨ سانڳے پرعزم ہیسے ۔
