نوجواناں کوں کھیݙاں دے میدان اچ اگوں ودھݨ دے ہکو سویں موقعے ݙیوݨ حکومت دی ترجیح اے، وزیراعظم محمد شہباز شریف

اسلام آباد۔17 اکتوبر (اے پی پی) وزیراعظم محمد شہباز شریف ملک اچ کھیݙاں دے فروغ تے کھݙاریاں دی سرپرستی کیتے جامع حکمتِ عملی دی ضرورت تے زور ݙیندیں ہوئیں آکھیا جو نوجواناں کوں کھیݙاں دے میدان اچ اگوں ودھݨ دے ہکو سویں موقع فراہم کرݨا حکومت دی ترجیح اے، کھیݙاں دے فروغ کیتے اجتماعی کوششاں، تربیت یافتہ کوچز تے مناسب وسائل فراہم کرݨے ہوسن، جوان کھݙاریاں کوں بلا امتیاز اگوں ودھݨ دے موقعے فراہم کیتے ویسن، جتھاں وی ٹیلنٹ موجود اے حکومت ایں کوں بھرپور انداز اچ فروغ ݙیسی، پاکستانی کھݙاریاں ایشین گیمز اچ ݙو چاندی تے اٹھ کانسی دے تمغے جِت تے ملک دا ناں روشن کیتے، کھیݙاں دے شعبے اچ ٻیا اقدامات تے مشاورت کیتے جلد سپورٹس کانفرنس دا انعقاد کیتا ویسے۔ اے ڳالھیں انہاں ایشین گیمز اچ میڈلز جِتݨ آلے کھݙاریاں دے اعزاز اچ تھیوݨ آلی تقریب نال خطاب کریندیں ہوئیں کیتا۔ تقریب اچ وفاقی وزیر برائے اطلاعات و نشریات عطاء اللہ تارڑ، چیئرمین وزیراعظم یوتھ پروگرام رانا مشہود احمد خان، قومی ہاکی ٹیم دے سابق کپتان تے اولمپئن حسن سردار، سکواش دے سابق عالمی چیمپئن جہانگیر خان وی موجود ہن۔ وزیراعظم ایشین گیمز اچ میڈل حاصل کرݨ آلے پاکستانی کھݙاریاں کوں مبارکباد ݙتی۔ وزیراعظم آکھیا جو ایشین گیمز اچ کھݙاریاں شبانہ روز محنت تے آپݨے والدین دیاں دعاؤں نال چاندی دے ݙو تے کانسی دے اٹھ میڈل جِت تے ملک دا ناں روشن کیتے لیکن اڄاں وی اگوں ودھݨ دی ٻہوں گنجائش اے، پاکستان کوں اللہ تعالیٰ ماضی اچ ہر میدان اچ کامیابیاں عطا کیتیاں، ہاکی دے میدان اچ ہک زمانے اچ پاکستان دا طوطی بولیندا ہا، حسن سردار، شہناز شیخ، شہباز سینیئر، شہباز جونیئر، اختر رسول تے ٻیاں کھݙاریاں پاکستان دا ناں دنیا اچ روشن کیتا، اسی طرح کرکٹ دے میدان اچ وی پاکستان جھنڈے ڳاڑیے، سکواش اچ جہانگیر خان تے جان شیر خان پاکستان دا ناں روشن کیتا جیڑھا جو دنیا دی سپورٹس دی تاریخ دا سنہرا باب اے، اسی طرح فٹبال تے ٻیاں کھیݙاں دے شعبیاں اچ وی اساݙے کھݙاریاں نمایاں کارکردگی دا مظاہرہ کیتے، اساݙیاں تریمت کھݙاری کرکٹ تے ہاکی دے میدان اچ تیزی نال اگوں ودھدیاں پئن، فٹبال، والی بال، کبڈی تے کھیݙاں دے تمام شعبیاں اچ کھیݙاں دے فروغ کیتے اجتماعی کوشساں، تربیت یافتہ کوچز تے مناسب وسائل فراہم کرݨے ہوسن، وزیراعظم آکھیا جو کھݙاریاں اچ انعامی چیکس دی تقسیم انہاں تے کوئی احسان نئی اے انہاں دا حق اے، کھیݙاں دے شعبے اچ ٻیا اقدامات تے مشاورت کیتے جلد سپورٹس کانفرنس دا انعقاد کیتا ویسے، سپورٹس کانفرنس اچ وفاقی و صوبائی حکام، ماضی دے کھݙاریاں تے سپورٹس سٹارز کوں مدعو کیتا ویسے تانجو کھیݙ دے میدان اچ پاکستان دا ماضی دا مقام ولا حاصل کیتا ون٘ڄ سڳے اتے کامیابی دے جھنڈے ڳاڑیے ون٘ڄ سڳن۔ تقریب نال خطاب کریندیں ہوئیں چیئرمین وزیراعظم یوتھ پروگرام رانا مشہود احمد خان آکھیا جو وزیراعظم محمد شہباز شریف نوجواناں کوں ہر شعبے اچ اگوں ودھݨ دے موقعے فراہم کیتے، تعلیم، آئی ٹی، مصنوعی ذہانت، آرٹس، ثقافت تے کھیݙاں اچ نوجواناں دی حوصلہ افزائی کیتی ویندی پئی اے۔ وزیراعظم محمد شہباز شریف قومی کھیݙ ہاکی دی بحالی کیتے پرعزم ہن۔ وزیراعظم ای-سپورٹس کوں کھیݙ قرار ݙیوݨ تے ای-سپورٹس پالیسی تے فیڈریشن دی منظوری ݙتی۔ انہاں آکھیا جو وزیراعظم دے اقدامات نال پاکستان اچ کھیݙاں دی بحالی دا عمل جاری اے، وزیراعظم میڈلز جِتݨ آلے کھݙاریاں دی حوصلہ افزائی کیتے انہاں کوں وزیراعظم ہاؤس سݙیے، حکومت کھیݙاں دے فروغ تے جوان کھݙاریاں دی حوصلہ افزائی کیتے پرعزم اے۔ قومی ہاکی ٹیم دے سابق کپتان تے اولمپئن حسن سردار آکھیا جو میڈلز جِتݨ آلے کھݙاریاں دی حوصلہ افزائی تے وزیراعظم دے مشکور ہیسے، ایشین گیمز اچ میڈلز جِت تے پاکستان دا پرچم بلند کرݨ آلے تمام کھݙاریاں کوں شاباش ݙینداں، سابق عالمی سکواش چیمپئن جہانگیر خان آکھیا جو ایشین گیمز اچ پاکستانی کھݙاریاں دی کارکردگی قابلِ ستائش اے، وزیراعظم ہاؤس اچ کھݙاریاں دی پذیرائی خوش آئند اے۔ ایں موقع تے مکسڈ مارشل آرٹ اچ تمغہ جِتݨ آلے کھݙاری آپݨے تاثرات بیان کیتے۔ وزیراعظم ایشین گیمز اچ میڈل جِتݨ آلے کھݙاریاں اچ چیکس وی تقسیم کیتے۔