اسلام آباد۔26مارچ (اے پی پی):وزیراعظم محمد شہباز شریف غزہ اچ جنگ بندی سانڳے اقوام متحدہ دی سکیورٹی کونسل دی قرارداد کوں چنڳاں قرار ݙیندے ہوئیں آکھیے جو عالمی برادری غزہ اچ وختی جنگ بندی سانڳے سکیورٹی کونسل دی قرارداد تے عملدرآمد یقینی بݨاوے۔ وزیراعظم آفس میڈیا ونگ توں جاری بیان اچ انہاں آکھیے جو غزہ اچ نہتے فلسطینیاں تے جاری صہیونی ظلم و جبر کوں مستقل طور تے بند تھیوݨا چاہیدے ۔ وزیراعظم مزید آکھیے جو اسرائیل دے وحشیانہ حملیں اچ ہݨ تئیں ہزاراں دی تعداد اچ تریمتاں تے ٻال شہید تھی چکن ۔ انہاں آکھیے جو غزہ اچ اسرائیل دی طرفوں دانستہ طور تے ہسپتالاں تے پناہ گزین کیمپاں کوں بمباری دا نشانہ بݨایا ڳئے جیڑھا جو قابل مذمت اے۔ وزیراعظم محمد شہباز شریف آکھیے پاکستان اپݨے نہتے فلسطینی بھیݨ بھراویں دی جون 1967ء توں پہلے سرحداں تے مشتمل فلسطینی ریاست گھنݨ سانڳے حمایت جاری رکھیسی۔
