اسلام آباد۔27مارچ (اے پی پی) وزیراعظم محمد شہباز شریف دی صدارت اچ داسو ہائیڈل پاور پراجیکٹ تے کم کرݨ آلے چینی شہریاں تے دہشت گرد حملے دے بعد ہنگامی اجلاس منعقد کیتا ڳئے جیں اچ سارے ریاستی وسائل کوں استعمال اچ گھن آندے ہوئیں دہشت گردی دا بھرپور انداز اچ مقابلہ کرݨ دے عزم دا اعادہ کیتا ڳئے جݙاں جو وزیراعظم ہدایت کیتی اے جو ایں واقعہ دی مشترکہ تحقیقات کیتیاں ونڄن ۔ وزیراعظم آفس دے میڈیا ونگ توں جاری پریس ریلیز موجب وزیراعظم محمد شہباز شریف دی صدارت اچ داسو ہائیڈل پاور پراجیکٹ تے کم کرݨ آلے چینی شہریاں تے بشام اچ دہشت گرد حملے دے بعد اعلیٰ سطح دا ہنگامی اجلاس تھئے جیں اچ وفاقی وزراء، چیف آف آرمی سٹاف، وزراء اعلیٰ، چیف سیکرٹریز اتے متعلقہ شعبیں دے انسپکٹر جنرل پولیس شرکت کیتی۔ اجلاس اچ پاکستان اچ ترقیاتی منصوبے تے کم کرݨ آلے نشوم شہریاں تے ݙراوݨے حملے تے ڳالھ مہاڑ کیتی ڳئی اے منصوبہ پاکستان اچ توانائی اتے پاݨی دے تحفظ دے حوالے نال اے۔ وزیراعظم حملے اچ جاں بحق تھیوݨ آلے بے گناہ چینی شہریاں دے اہلخانہ نال دلی تعزیت کریندے ہوئیں انہاں کوں یقین ݙیوائے جو ایں وشیانہ فعل دے مجرماں کوں وختی انصاف دی کچاری اچ گھن آیا ویسی۔ وزیراعظم پاکستان تے چین دے عوام وچال بھرپی دے رشتے کوں اجاگر کریندے ہوئیں آکھیے جو پوری قوم چینی باشندیں دی جاناں دے ضیان تے ݙکھی اے ۔ انہاں قانون نافذ کرݨ آلے اداریں تے مقامی لوکاں دی طرفوں حملے تے وختی ردعمل کوں چنڳاں آکھیے جیں اچ کئی قیمتی جاناں کوں بچایا ڳئے ۔ وزیراعظم ہدایت کیتی جو ریاست دے سارے وسائل کوں بروئے کار گھن آندے ہوئیں ایں واقعے دی مشترکہ تحقیقات کیتیاں ونڄݨیاں چاہیدن ۔ وزیراعظم آکھیے جو دہشت گردی ھک بین الاقوامی خطرہ اے جیں کوں پاکستان دے دشمناں پاکستان دی ترقی و خوشحالی اچ رکاوٹ پاوݨ سانڳے استعمال کیتے، پاک۔چین دوستی کوں نشانہ بݨاوݨ آلیں دے انہاں اقدامات دا مقصد ݙوفہیں ملکاں وچال عدم اعتماد پیدا کرݨا اے ۔ اجلاس دے شرکاء ملک توں دہشت گردی کوں منڈھوں مکاوݨ دے عزم دا اعادہ کیتے ۔ شرکاء سرحد پاردہشت گرداں دی محفوظ پناہ گاہواں تے تشویش کریندے ہوئیں دہشت گردی دا مقابلہ کرݨ سانڳے علاقائی نکتہ نظر دی لوڑھ تے زور ݙتا ۔ اجلاس اچ چیف آف آرمی سٹاف جنرل سید عاصم منیر ملک کوں پیش آندی دہشت گردی دی لعنت مکاوݨ سانڳے مسلح افواج دے عزم دا اعادہ کریندے ہوئیں آکھیے جو قوم گزریل ݙو ݙھاکیں توں دہشت گردی دے خلاف جنگ لڑدی پئی اے تے پاکستان دے دشمناں دے مذموم عزائم کوں ناکام بݨائے ۔ آرمی چیف دہشت گردی دے واقعات اچ اڄوکے ودھارے دے حوالے نال آکھیے جو پاکستان دے دشمناں ھک واری ول ریاست تے پاکستان دے عوام دے حوصلے اتے عزم دا غلط اندازہ لاتے ۔ انہاں آکھیے اساں دہشت گردی دے خلاف ایں ویلھے تئیں جنگ لڑسوں جݙاں تئیں پاکستان، ایندے عوام اتے اتھاں کم کرݨ آلے غیر ملکی مہماناں تے بری نظر رکھݨ آلے ہر دہشت گرد دا خاتمہ نی تھی ویندا ۔ اساں ایں ڳالھ کوں یقینی بݨاوݨ اچ کوئی کسر نہ چھوڑیسوں جو ہر غیر ملکی شہری خاص طور تے چینی شہری جیڑھے پاکستان دی خوشحالی اچ اپݨا کردار نبھیندے پئن پاکستان اچ محفوظ رہن، اساں پوری طاقت نال دہشت گردی دا آخری دم تئیں مقابلہ کریسوں ۔ اجلاس دے شرکاء ریاست دے سارے دستیاب وسائل کوں بروئے کار گھن آندے ہوئیں دہشت گردی دا جامع مقابلہ کرݨ دے عزم دا اعادہ کیتے۔
