اسلام آباد۔27مارچ(اے پی پی):صدر مملکت آصف علی زرداری آکھیے جو پاکستان دہشتگرداں کوں خطے اچ امن، خوشحالی و سلامتی کیتے ساݙے اہداف کمزور کرݨ دی اجازت نا ݙیسی، غیر انسانی حملہ ݙوہاں ملکاں وچال پائیدار دوستی و مشترکہ اقدار تے حملہ اے، اے واقعہ پاک چین سنڳت دشمناں ٻݨایا ہا۔ اے ڳالھ صدر مملکت آصف علی زرداری چین دے سفارت خانے دے دورے ویلھے آکھی جتھاں پڄݨ تے چینی سفیر چیانگ زئے دونگ انہاں دا استقبال کیتے۔ صدر مملکت بشام اچ دہشت گرد حملے اچ چینی شہریاں دی ہلاکت تے پاکستانی حکومت اتے عوام ولوں پرچاوݨی ݙتی، پاکستانی قوم چینی عوام دے غم اچ برابر دی شریک اے، ایں ݙکھ اچ اساں چینی عوام دے نال ہیں، دشمن پاک چین سنڳت تکڑی تھیندی نئیں ݙیکھ سڳدا، ایں دہشتگردی اچ ملوث عناصر کوں انصاف دے کٹہرے اچ ڳھن آیا ویسی، پاکستان مختلف منصوبیاں تے کم کرݨ آلے چینی شہریاں دی سکیورٹی کیتے سارے اقدامات کریسی۔ چینی سفیر انسداد دہشت گردی اچ تعاون وھاوݨ، پاکستان اچ چینی کارکناں کوں تحفظ ݙیوݨ تے زور ݙتے۔ چینی سفیر پاکستان نال ڳانݙھا ٻیا تکڑا کرݨ، سی پیک سودھا ٻئے منصوبیاں کیتے حمایت جاری رکھݨ دا عزم دوہرایا۔
