اسلام آباد۔28مارچ(اے پی پی):صدر مملکت آصف علی زرداری پاکستان اتے برطانیہ وچال تجارتی اتے اقتصادی تعلقات مزید تکڑے بݨاوݨ دی لوڑھ تے زور ݙیندے ہوئیں آکھیے جو پاک-برطانیہ تعلقات کوں اعلیٰ سطحی رابطیں تے عوامی تعلقات نال تقویت ملی اے۔ ایوان صدر دے پریس ونگ موجب صدر مملکت اے ڳالھ برطانوی ہائی کمشنر جین میریٹ نال ملاقات اچ آکھی اے جنہاں ایوان صدر اچ ملاقات کیتی ۔ صدر مملکت اتے برطانوی ہائی کمشنر ملاقات اچ ݙو طرفہ اہمیت دے امور تے ڳالھ مہاڑ کیتی ۔ صدر مملکت آکھیے جو پاکستان تے برطانیہ وچال خوشگوار تعلقات ہن جنہاں کوں ݙوہیں ملکاں دے اعلیٰ سطحی رابطیں اتے عوامی تعلقات توں تقویت ملی اے۔ صدر مملکت ملاقات اچ برطانیہ دے بادشاہ چارلس سوئم اتے پرنسز آف ویلز کیتھرین مڈلٹن سانڳے نیک خواہشات دا اظہار کیتے۔ جین میریٹ صدر آصف علی زرداری کوں عہدہ صدارت سنبھالݨ تے مبارخ وی ݙتی۔
