اسلام آباد۔28مارچ(اے پی پی):وزیر اعظم محمد شہباز شریف آکھیے جو ملک کوں پیش آندے سارے چیلنجز نال نبݨݨ سانڳے مضبوط معیشت کلیدی حیثیت رکھیندی اے ۔انہاں اے ڳالھ نیول ہیڈ کوارٹرز دا دورہ کریندے ہوئیں آکھی اے ۔ وزیراعظم آفس دے میڈیا ونگ توں جاری بیان موجب وزیر اعظم پاکستان محمد شہباز شریف وفاقی وزرا دے رلے نیول ہیڈ کوارٹرز دا دورہ کیتے، پاک بحریہ دے سربراہ ایڈمرل نوید اشرف وزیراعظم دا استقبال کیتا تے وزیراعظم کوں پاک بحریہ دے چاق وچوبند دستے گارڈ آف آنر پیش کیتا۔ وزیراعظم یادگار شہدا تے پھلاں دی چادر چڑھائی اتے بعد اچ نیول ہیڈ کوارٹرز دے پرنسپل اسٹاف آفیسرز نال انہاں دا تعارف کرایا ڳئے۔ملاقات اچ علاقائی بحری سلامتی متعلق امور تے پاک بحریہ دی آپریشنل تیاریاں تے ڳالھ مہاڑ کیتی ۔ امیر البحر وزیراعظم کوں پاک بحریہ دے کردار، صلاحیتاں اتے مستقبل اچ جدت گھن آوݨ دے منصوبیں دا ݙسائے۔ بعدا چ ڈپٹی چیف آف نیول اسٹاف (آپریشنز) دی طرفوں موجودہ سمندری صورتحال، پاک بحریہ کوں پیش آندے چیلنج اتے انہاں نال نبݨݨ سانڳے پاک بحریہ دے ردعمل بارے تفصیلی بریفنگ ݙتی ڳئی ۔ وزیراعظم کوں خاص طور تے میری ٹائم شعبہ اچ ملک کوں پیش آندے موجودہ اتے مستقبل دے چیلنجز نال نبݨݨ سانڳے پاک بحریہ دی استعداد کار اچ ودھارے سانڳے ضرورتاں بارے ݙسایا ڳئے۔ انھاں کوں میری ٹائم سیکٹر دے معاشی امکانات توں فیدہ چاوݨ دے اقدامات دا وی ݙسایا ڳئے ۔ وزیراعظم محدود وسائل دے باوجود ملک دے بحری مفادات دے تحفظ سانڳے پاک بحریہ دی خدمات دی تعریف کیتی ۔ انہاں نیول ایئربیس تربت تے اڄوکے دہشت گردانہ حملے کوں ناکام بݨاوݨ سانڳے پاک بحریہ دے پیشہ وارانہ ردعمل دی تعریف کیتی۔
