اسلام آباد۔28مارچ(اے پی پی)پنجاب اسمبلی مالی سال 24-2023 دا بجٹ منظور کر ڳھدے۔ پنجاب اسمبلی دے اجلاس دی اڳواݨی سپیکر ملک محمد احمد خان کیتی اتے اڄوکے مالی سال دے بجٹ دی منظوری ݙتی ڳئی۔ اجلاس اچ سالانہ بجٹ و مطالبات زر تے ووٹنگ اتے بحث شروع تھئی جیندے اچ 42 مطالبات زر پیش کیتے ڳن۔ ایوان اچ کٹوتی دیاں 7 تحریکاں وی پیش کیتاں ڳن۔ اجلاس اچ سنی اتحاد کونسل دے رہنما امتیاز شیخ تریمتیں کوں خیراتی سیٹاں دا طعنہ ݙیوݨ تے ایوان اچ شور شرابا تھیا اتے امتیاز شیخ دی حکومتی رکن اسمبلی خلیل طاہر سندھو نال تلخ کلامی وی تھئی۔ بعد اچ اپوزیشن اراکین اسپیکر ڈائس دا گھیراؤ کیتے اتے ایوان اچ شیم شیم دے نعرے لائے ڳن اتے ݙوہیں پاسو دے ارکان سیٹاں تے کھڑے تھی تے احتجاج کریندے رہین۔
