کراچی۔29مارچ (اے پی پی) وزیر خزانہ محمداورنگزیب آکھیا جو جی ڈی پی دے تناسب نال ٹیکساں اچ ودھارا، توانائی دے شعبے اچ نقصانات اچ ڳھٹکی اتے ملکی اداریاں کوں خسارے توں کݙھݨ اساݙی ترجیح اے۔ رمضان پیکیج کوں 7.5 ارب روپے توں ودھا تے 12 ارب روپے کر ݙتا ڳئے۔ یوٹیلیٹی سٹور تے شئیں دا معیار بہتر کیتا ویندا پئے۔ اے ڳالھیں انہاں جمعے کوں کراچی اچ یوٹیلیٹی سٹورکارپوریشن دے دورے دے موقع تے میڈیا نال ڳالھ مہاڑ کریندیں ہوئیں آکھی۔ انہاں آکھیا جو 1200 موبا ئل پوائنٹس دے ذریعہ صارفین کوں شئیں ݙتی ویندی پئی۔ ہک سوال دے ولدے اچ انہاں آکھیا جو اڄوکی حکومت ولوں کنڑک دی برآمد دی موکل نی ݙتی ڳئی، کنڑک دی فصل بارے چنڳی خبراں امدی پئن۔
