اسلام آباد۔29مارچ (اے پی پی) وزیراعظم محمد شہباز شریف آکھیا جو سمگلنگ دے خاتمے کیتے وفاق، صوبے اتے سارے اداریاں کوں رَل تے کم کرݨا پوسی، ملکی معیشت اتے عوام دی بہتری کیتے کیتے ڳئے فیصلیاں اچ کہیں کوں آڑے نہ آوݨ ݙیسوں۔ تقسیم در تقسیم سیاست دا خاتمہ اتے یکسوئی نال ملک دے مسئلیاں اتے چیلنجز دا مقابلہ کر تے ملک کوں ترقی اتے خوشحالی دی راہ تے ٹورݨ اساݙا ہدف اے اتے ایں اوں ویلھے ممکن اے جݙاں وفاقی، صوبے، افواج پاکستان اتے سارے ادارے عظیم مشن کیتے کٹھے تھی تے کم کروں۔ وزیراعظم اے ڳالھیں جمعے کوں انسداد سمگلنگ بارے اعلیٰ سطح دے اجلاس دی صدارت کریندیں ہوئیں آکھی۔ اجلاس اچ آرمی چیف جنرل عاصم منیر، چاروں صوبیاں دے وزراء اعلیٰ، وزیراعلیٰ گلگت بلتستان، وزیراعظم آزاد جموں و کشمیر، سارے چیف سیکرٹریز، آئی جیز پولیس اتے اعلیٰ سول تے فوجی افسر شریک تھیے۔ وزیراعظم آپݨے خطاب اچ آکھیا جو وفاق اتے صوبیاں اچ نویں حکومتاں کوں چووی ݙینھ تھی ڳئن، ایں ویلھے اساݙی ساریاں توں وݙی اتے اہم مصروفیت اتے پالیسی ٻݨاوݨ اے تانجو معیشت کوں سنبھالیا ونڄے۔ وزیراعظم آکھیا جو سمگلنگ دے خاتمے کیتے وفاق، صوبے اتے سارے اداریاں کوں رَل تے کم کرݨا پوسی، ملکی معیشت اتے عوام دی بہتری کیتے کیتے ڳئے فیصلیاں اچ کہیں کوں آڑے نہ آوݨ ݙیسوں۔
