حکومت اقتصادی استحکام، مالیاتی نظم و ضبط اتے پائیدار اقتصادی نمو کیتے کم کریندی پئی اے، وزیر خزانہ دی مالیاتی اداریاں دے سربراہاں نال ڳالھ مہاڑ

کراچی۔29مارچ (اے پی پی):وفاقی وزیر خزانہ محمد اورنگزیب آکھیے جو حکومت اقتصادی استحکام، مالیاتی نظم و ضبط اتے پائیدار اقتصادی نمو کیتے کم کریندی پئی اے، حکومت دے ترقیاتی ایجنڈے سانڳے بینکاری دے شعبہ کوں اپݨا کردار ادا کرݨا ہوسی۔ او کراچی اچ گورنر سٹیٹ بینک جمیل احمد اتے کلیدی بینکاں دے چیف ایگزیکٹو افسران اتے صدور نال ملݨ ویلھے الیندے پئے ہن۔ ملاقات اچ اقتصادی نمو اتے پاکستان دی ترقی کیتے ترجیحی شعباں کوں بینکاں ولوں قرض ݙیوݨ ودھاوݨ بارے الایا ڳیا۔ وزیر خزانہ شرکاء کوں ملک دی اڄوکی اقتصادی صورتحال تے تفصیلی بریفنگ ݙتی۔ انہاں بنکاں کوں آکھیے جو او زراعت، ایس ایم ایز، انفارمیشن ٹیکنالوجی اتے ٻئے ترجیحی شعباں کیتے قرض اتے مالیاتی معاونت ودھاون اتے ایں سانڳے متعلقہ ٹاسک فورس دی ذمہ داریاں پاکستان بینکس ایسوسی ایشن سنبھالے۔ گورنر سٹیٹ بینک وزیر خزانہ دے اقدامات دی حمایت کیتی اتے بنکان ولوں تعاون دا یقین ݙیوایا جو ایں سانڳے سٹیٹ بینک ریگولیٹری اتے پالیسی رہنمائی کیتے ہتھ ونݙیسی۔