اسلام آباد۔29مارچ (اے پی پی):وزیراعظم محمد شہباز شریف دی اڳواݨی اچ اہم اجلاس تھئے جیندے اچ انسداد بجلی چوری پالیسی، بجلی دیاں تقسیم کار کمپنیاں دی جدید بنیاداں تے تشکیل نو، بجلی چوری مکاوݨ کیتے سمارٹ میٹرز لاوݨ اتے کرپٹ افسران دے خلاف سخت کارروائی دے احکامات تے وفاق اتے صوبائی حکومتاں وچال معاہداں دی منظوری ݙتی گئی۔ اجلاس اچ وفاقی کابینہ دے اراکین، چیف آف آرمی سٹاف، صوبائی وزراء اعلیٰ اتے اعلیٰ حکام شرکت کیتی۔ اجلاس اچ جرائم پیشہ مافیا، سمگلنگ، ذخیرہ اندوزی، منی لانڈرنگ، بجلی چوری اتے غیر قانونی غیر ملکیاں دی وطن واپسی دے اقدامات تے بریفنگ ݙتی گئی۔ اجلاس دے شرکا سمگلراں، ذخیرہ اندوزاں اتے مارکیٹ اجارہ داراں دے خلاف کارروائی تے زور ݙیندے عام لوکاں کوںو دھ سوکھ ݙیوݨ اتے معاشی بہتری کیتے اقدامات دا عزم دوہرایا۔ چیف آف آرمی سٹاف اجلاس اچ پاک فوج ولوں ملک دی معاشی بحالی دے حکومتی اقدامات کیتے پتھ ونݙاوݨ دا یقین ݙیوایا۔ وزیراعظم ہدایت کیتی جو متعلقہ ادارے غیر قانونی سرگرمیاں اتے جرائم پیشہ مافیا کوں ودھ سزائیں ݙیوݨ کیتے اقدامات کرن۔
