اسلام آباد۔2اپریل(اے پی پی):وزیرِ اعظم محمد شہباز شریف آندے 5 سالاں اچ ملکی برآمدات ݙوڑی کرݨ کیتے منسوبہ بندی، ای کامرس شعبے اچ برآمد کنندگان کوں سوکھ ݙیوݨ اتے وزارت تجارت کوں ’’میڈ ان پاکستان‘‘برانڈ برآمد کرݨ آلیاں دے مسلیاں دے فوری حل دی ہدایت کیتی اے۔ او اسلام آباد اچ برآمدی شعبے دی ترقی بارے اعلیٰ سطح اجلاس نال خطاب کریندے پئے ہن۔ اجلاس اچ وفاقی وزراء جام کمال خان، رانا تنویر حسین، ای-کامرس شعبے دے برآمد کنندہ انٹرپرینیور بشمول یوٹوپیا دے چیف ایگزیکٹو آفیسر جبران نیاز، ذیشان شاہ، سلمان احمد اتے متعلقہ اعلیٰ حکام شرکت کیتی۔ اجلاس اچ پاکستان اچ برآمدی شعبے دی ترقی کیتے تجاویز ݙتیاں ڳن اتے برآمدی شعبے دی سہولت کیتے سفارشات سودھا برآمدات ودھاوݨ سانڳے منصوبہ بندی دا وی ݙسایا ڳیا۔ وزیرِ اعظم وزارت تجارت کوں سارے فریقین اتے انٹرپرینیورز نال صلاح دے بعد ملکی برآمدات کوں آندے 5 سال اچ ݙوڑا کرݨ کیتے لائحہ عمل ٻݨاوݨ دی ہدایت کیتی اتے آکھیا جو ای کامرس شعبے اچ برآمد کنندگان کوں سوکھ ݙیوݨ اتے وزارت تجارت کوں ’’میڈ ان پاکستان ‘‘ برانڈ برآمد کرݨ آلیاں دے مسائل فوری حل کیتے ونڄن۔
