پاکستان دے عوام متحدہ عرب امارات کوں آپݨا ݙوجھا گھر سمجھدن، سانجھی تجارت اتے کاروباری رابطے کوں مزید مضبوط کرݨ چاہندن ، وفاقی وزیر اطلاعات عطاءاللہ تارڑ دی یو اے ای دے سفیر نال ڳالھ مہاڑ

اسلام آباد۔3اپریل(اے پی پی):وفاقی وزیر اطلاعات و نشریات عطاءاللہ تارڑ متحدہ عرب امارات دی ترقی اتے تبدیلی سانڳے متحدہ عرب امارات دی قیادت دے وژن اتے کوششاں دی تعریف کریندے ہوئیں آکھیے جو پاکستان دے عوام متحدہ عرب امارات کوں آپݨا ݙوجھا گھر سمجھدن ، وزیراعظم شہباز شریف دے وژن موجب یو اے ای تے پاکستان وچال تجارت اتے کاروباری رابطے کوں مزید مضبوط کرݨ چاہندے ۔ او متحدہ عرب امارات دے سفیر حماد عبید ابراہیم سالم الزابی نال ملاقات دے دوران ڳالھ مہاڑ کریندے پئے ہن ۔ ملاقات اچ ݙوطرفہ تعلقات، مختلف شعبہ جات اچ تعاون دے ودھارے سودھے سانجھی دلچسپی دے امور تے ڳالھ مہاڑ تھئی ۔ متحدہ عرب امارات دے سفیر بشام اچ دہشت گردی دے واقعہ دی مذمت کیتی۔ وفاقی وزیر اطلاعات آکھیے جو پاکستان اتے متحدہ عرب امارات وچال مشترکہ ورثے اتے کثیر الجہتی تعاون تے مبنی تعلقات استوار ہن، پاکستان دے عوام متحدہ عرب امارات کوں آُپݨا ݙوجھا گھر سمجھدن ۔ انہاں آکھیے ایمریٹس ایئر لائن دی پہلی پرواز پی آئی اے دے پائلٹ اݙائی جیڑھی جو ݙوہیں ملکاں وچال تعاون دی اعلیٰ مثال اے۔ وفاقی وزیر آکھیے عزت مآب مرحوم شیخ زید دے پاکستان دی قیادت تے عوام نال نیڑے تعلقات ہن ۔ وفاقی وزیر اطلاعات یو اے ای دے سفیر کوں حکومت دے معاشی اقدامات دا ݙسیندے ہوئیں آکھیے جو ایف بی آر اچ ٹیکس اصلاحات گھن آئیاں ویندیاں پئن جݙاں جو معاشی شعبہ اچ ڈیجیٹلائزیشن سانڳے کم کیتا ویندا پئے ۔ انہاں آکھیے وزیراعظم شہباز شریف دے وژن موجب تجارت اتے کاروباری رابطے کوں مزید تکڑا کرݨ چاہندوں ۔ وفاقی وزیر اطلاعات معیشت دی بہتری سانڳے مشترکہ روڈ میپ بݨاوݨ دی لوڑھ تے زور ݙتا۔