اسلام آباد۔03 اپریل(اے پی پی)صدر مملکت آصف علی زرداری نال چیف آف آرمی سٹاف جنرل سید عاصم منیر ملین۔ چیف آف آرمی سٹاف صدر مملکت آصف علی زرداری کوں صدر پاکستان اتے مسلح افواج دے کمانڈر دا عہدہ سنٻھالݨ تے مبارک ݙتی اتے دہشتگردی دے خلاف جاری فوجی آپریشنز دا وی ݙسایا۔ چیف آف آرمی سٹاف روایتی خطرات بارے آپریشنل تیاریاں تے وی بریفنگ ݙتی۔ جنرل سید عاصم منیر بلوچستان اتے خیبرپختونخوا دے علاقیاں سودھا ترقیاتی منصوبیاں اچ فوج دے کردار دا ݙسایا۔ صدر مملکت پاکستان دی مسلح افواج دے مثالی کردار دی تعریف کریندے آکھیا جو ریاست دی خودمختاری اتے علاقائی سالمیت دے تحفظ کیتے فوج دی خدمات اہم ہین، متاثرہ علاقیاں دی سماجی ترقی کیتے فوج دیاں کوششاں قابل تعریف ہین۔ صدر مملکت آصف علی زرداری دہشت گردی دے خلاف پاکستان دا عزم دوہرائے جو قومی طاقت دے سارے عناصر نال دہشت گردی دا تکڑا ولدا ݙتا ویسی۔
