وزیراعظم دی صدارت اچ وفاقی کابینہ دا اجلاس، کݨک مل گھنݨ سانڳے اہداف مکمل کرݨ دی ہدایت، پاکستان دی تکھی رفتار ترقی سانڳے کہیں قسم دی وسلائی برداشت نہ کیتی ویسی ، شہباز شریف

اسلام آباد۔17اپریل(اے پی پی):وفاقی کابینہ کݨک ملھ گھنݨ سانڳے اہداف مکمل کرݨ دی ہدایت کریندے ہوئیں واہ چھاوݨی اچ انسٹی ٹیوٹ آف مارڈرن سائنسز دے قیام دے حوالے نال ٻل تے سپیشل کورٹ II (انسداد دہشت گردی) کوں آفیشل سیکرٹ ایکٹ 1923 دے تحت رپورٹ تھئے کیسز سݨݨ دا اختیار ݙیوݨ دی منظوری ݙے ݙتی جݙاں جو وزیراعظم شہباز شریف آکھیے جو سعودی عرب اتے پاکستان دے تعلقات نویں دورے اچ داخل تھی چکن ، اساکوں پاکستان دی ترقی سانڳے تکھی رفتارنال کم کرݨا اے کہیں قسم دی وسلائی برداشت نہ کیتی ویسی ، کساناں کوں انہاں دی محنت دا معاوضہ پڄاوݨ سانڳے ہر ممکن اقدامات کیتے ویسن۔  وزیراعظم آفس دے میڈیا ونگ توں جاری بیان موجب وزیراعظم محمد شہباز شریف دی صدارت اچ وفاقی کابینہ دا اجلاس تھیا ۔ اجلاس دے شرکاء نال ڳالھ مہاڑ کریندے ہوئیں وزیرِ اعظم سعودی وفد دے دورے کوں کامیاب بݨاوݨ دے حوالے نال وفاقی وزراء ، سیکرٹریز اتے ٻئے حکام دی تعریف کیتی تے انہاں دیاں کوششاں تے محنت دی تعریف کیتی ۔ انہاں آکھیے جو سعودی عرب اتے پاکستان دے معاشی تعلقات ھک نویں دور اچ داخل تھی چکن ۔وزیر اعظم آکھیے جو اساکوں پاکستان دی ترقی سانڳے تکھی رفتاری نال کم کرݨا اے ، کہیں وی قسم دی وسلائی برداشت نہ کیتی ویسی ۔ وفاقی کابینہ وفاقی وزیر قومی غذائی تحفظ و تحقیق کوں چارے صوبیں نال رابطہ کرتے کݨک مل گھنݨ دے اہداف مکمل کرݨ دی ہدایت کیتی ۔ وزیراعظم آکھیے کساناں کوں انہاں دی محنت دا معاوضہ پڄاوݨ سانڳے ہر ممکن اقدامات کیتے ویسن ۔وفاقی کابینہ وزارتِ وفاقی تعلیم و فنی تربیت دی سفارش تے واہ چھاؤݨی اچ انسٹی ٹیوٹ آف ماڈرن سائنسز دے قیام دے حوالے نال ٻل دی اصولی مںظوری ݙتی ۔ وزیراعظم نویں یونیورسٹیز اتے اعلیٰ تعلیمی اداریں دے قیام دے طریقہ کار کوں مزید چنڳاں بݨاوݨ دے حوالے نال ھک کمیٹی بݨاوݨ دی ہدایت کیتی جیں دی سربراہی وزیر وفاقی تعلیم و فنی تربیت کریسن جݙاں جو وزیر پٹرولیم ، وزیر مملکت انفارمیشن ٹیکنالوجی اتے اٹارنی جنرل کمیٹی دے ممبران ہوسن ۔وفاقی کابینہ وزارت خارجہ دی سفارش تے سابق سفیر منظور احمد چوہدری کوں انہاں دی خدمات دے اعتراف اچ ’’حکومت کوٹ ڈی وائیر کمانڈیور ڈی آرڈر نیشنل ‘‘ایوارڈ وصول کرݨ دی اجازت ݙے ݙتی۔ وفاقی کابینہ وزارت قانون و انصاف دی سفارش تے احتساب عدالت – VIII کراچی کوں اسپیشل کورٹ (کسٹمز، ٹیکسیشن  اتے انسداد اسمگلنگ- II)،  احتساب عدالت -III حیدر آباد کوں بینکنگ کورٹ میر پور خاص، احتساب عدالت -III سکھر کوں بینکنگ کورٹ گھوٹکی، احتساب عدالت -IV سکھر کوں بینکنگ کورٹ شہید بینظیر آباد اچ بدالݨ دی منظوری ݙے ݙتی۔ وفاقی کابینہ وزارتِ قانون و انصاف دی سفارش تے سپیشل کورٹ II (انسداد دہشت گردی) کوں آفیشل سیکرٹ ایکٹ 1923 دے تحت رپورٹ تھئے کیسز سݨݨ دا اختیار ݙیوݨ دی منظوری ݙتی ۔ اسپشل کورٹ II کوں اے اختیار سپشل کورٹ I دے جج دے  رخصت تے ونڄݨ دی وجہ توں ݙتا ڳئے ۔وفاقی کابینہ وزارتِ سمندر پار پاکستانیز و ترقی انسانی وسائل دی سفارش تے وزارت لیبر، حکومت قطر اتے وزارت سمندر پار پاکستانیز و ترقی انسانی وسائل وچال لیبر ریلیشنز، لیبر انسپکشنز، پیشہ وارانہ تحفظ اتے صحت دے حوالے نال مفاہمتی یادداشت تے دستخط کرݨ دی منظوری ݙتی  کابینہ کوں ݙسایا ڳئے جو ایں ویلھے 3 لکھ پاکستانی قطر اچ کم کریندے پئن جیڑھے جو 850 ملین روپےدا زرمبادلہ پاکستان بھیجیندے پئن ۔ وفاقی کابینہ وزارتِ منصوبہ بندی اتے خصوصی اقدامات دی سفارش تے فیڈرل پبلک پرائیویٹ پالیسی آف پاکستان 28۔2023  دی منظوری ݙتی ۔ ایں حوالے نال وزیراعظم آکھیے جو پبلک پرائیویٹ پارٹنرشپ دے ذریعے معیشت دا پیتھا تکھا کیتا ونڄ سڳدے ۔ انہاں ساریاں وزارتاں کوں پبلک پرائیویٹ پارٹنرشپ دے حوالے نال آپݨی آپݨی تجویزاں پیش کرݨ دی ہدایت کیتی ۔ وفاقی کابینہ اقتصادی رابطہ کمیٹی دے 4 اپریل 2024 کوں تھیوݨ آلے اجلاساں اچ کیتے ڳئے فیصلیں دی توثیق کرݙتی۔