پاکستان اچ سیمی کنڈکٹر انڈسٹری سانڳے وݙی صلاحیت موجود اے ، وفاقی وزیر اطلاعات عطاءاللہ تارڑ دا سیمی کنڈکٹر سمٹ 2024ء توں خطاب

اسلام آباد۔18اپریل (اے پی پی):وفاقی وزیر اطلاعات و نشریات عطاءاللہ تارڑ سیمی کنڈکٹر ٹیکنالوجی تے توجہ ݙیوݨ دی لوڑھ تے زور ݙیندے ہوئیں آکھیے جو پاکستان اچ سیمی کنڈکٹر انڈسٹری سانڳے وݙی صلاحیت موجود اے ، ملک کنے قدرتی وسائل، نینگر ہنر مند افرادی قوت اتے اہم جغرافیائی محل وقوع اے، حکومت سرمایہ کاراں کوں راغب کرݨ تے انڈسٹری دی ترقی اچ مدد سانڳے ضروری سہولتاں ݙیوݨ سانڳے پرعزم اے ۔ سیمی کنڈکٹر انڈسٹری اچ تعاون نال ملک کوں عالمی معیشت نال جوڑیا ونڄ سڳدے ۔ اے ڳالھ انہاں مقامی ہوٹل اچ سیمی کنڈکٹر سمٹ 2024ءتوں خطاب اچ آکھی اے ۔ وفاقی وزیر اطلاعات آکھیے سرمایہ کاری گھن آوݨ سانڳے خصوصی سرمایہ کاری سہولت کونسل بݨائی ڳئی ۔ اساں ملک اچ کاروباری آسانیاں اتے جدت کوں ودھارا ݙیوݨ سانڳے پرعزم ہیسے، پاکستان اچ بھرپور قدرتی وسائل موجود ہن ، اساں دنیا دی پنجویں وݙی جمہوریت ہیسے تے دنیا کوں ݙساوݨ کیتے اساں کنے ھک بہترین سٹوری موجود اے ۔ انہاں آکھیے انسانی وسائل ساݙا ساریں توں وݙا سرمیہ ہن ۔ ساݙے ملک دی 68 فیصد آبادی نینگراں دی ہے ، دنیا اچ آپݨے سٹریٹجک محل وقوع تے اساکوں فخر اے ، پاکستان دنیا دے سنگم تے واقعہ اے۔ انہاں آکھیے گزریل ݙینھ وفاقی کابینہ دے اجلاس اچ پبلک پرائیویٹ پارٹنر شپ پالیسی فریم ورک دی منظوری ݙتی ڳئی ۔ انہاں آکھیے سرمایہ کاراں کوں سہولت ݙیوݨ حکومت دی ذمے واری اے ۔ وفاقی وزیر اطلاعات آکھیے جو پاکستان اچ ہر سال 50 ہزار انجینئرنگ گریجویٹس تیار تھیندن ، اساں کنے دنیا دی بہترین انجینئرنگ یونیورسٹیاں ہن اتے ساݙے انجینئرنگ گریجویٹس کوں عالمی سطح تے منیا ویندے لیکن بدقسمتی نال اساں سیمی کنڈکٹر انڈسٹری توں فیدہ نی چا سڳیے ۔ سیمی کنڈکٹر انڈسٹری ایں ویلھے 550 ارب ڈالر دی صنعت اے جیڑھا جو 2030ءتئیں ھک ٹریلین ڈالر تئیں پڄݨ دی پیشنگوئی اے۔ انہاں آکھیے وزیراعظم شہباز شریف پیشہ ورانہ تربیت اتے ہنر مندی کوں ٻہوں اہمیت ݙیندن ۔ اساکوں ووکیشنل ٹریننگ تے توجہ ݙیوݨ دی لوڑھ اے ۔ انہاں آکھیے اے سمٹ کراوݨ تے عوامی و نجی شعبے کوں ھکے ویلھے کٹھا کرݨ تے منتظمین دے دلوں شکر گزارہیسے۔