وزیراعظم کوں افغان ٹرانزٹ ٹریڈ دے حوالے نال کمیٹی دی رپورٹ پیش، شہباز شریف دی کھنڈ سودھے ٻئی سمگلنگ مکاݨ دی ملک گیر مہم تکھی کرݨ دی ہدایت

اسلام آباد۔19اپریل(اے پی پی):وزیرِ اعظم محمد شہباز شریف سمگلنگ مکاوݨ سانڳے ملک گیر مہم کوں تکھا کرݨ ، ملوث نشاندہی شدہ افسراں کوں عہدے توں وختی ً ہٹاوݨ تے محکمانہ کارروائی کرݨ ، سارے متعلقہ اداریں کوں ھک ݙوجھے نال تعاون ، سمگلراں اتے منشیات دے کاروبار اچ ملوث لوکاں کوں مثالی سزا ݙیواوݨ ، ایں حوالے نال ضروری قانون سازی تے کھنڈ دی مکمل طور تے سمگلنگ روکݨ دی ہدایت کیتی ۔ وزیراعظم آفس دے میڈیا ونگ توں جاری بیان موجب وزیرِ اعظم محمد شہباز شریف دی صدارت اچ ملک اچ سمگلنگ روکݨ دے حوالے نال اعلیٰ سطح دا جائزہ اجلاس تھئے ۔ وزیراعظم محمد شہباز شریف اجلاس اچ ڳالھ کریندے ہوئیں آکھیے جو پاکستان توں سمگلنگ منڈھوں مکاوݨ دا عزم کرینداں ، آرمی چیف جنرل سید عاصم منیر دے سمگلنگ مکاوݨ سانڳے حکومت نال مکمل تعاون تے انہاں کوں خراجِ تحسین پیش کریندوں ۔ وزیرِ اعظم کوں ݙسایا ڳئے سمگلراں، ذخیرہ اندوزاں اتے انہاں دے سہولت کار سرکاری افسراں دی فہرست تیار کرتے قانون نافذ کرݨ آلے اداریں تے صوبیں کوں ݙتیاں ڳئن ۔ وزیرِ اعظم نشاندہی تھیوݨ آلے افسراں کوں وختی ہٹاوݨ تے محکمانہ کارروائی ، سارے قانون نافذ کرݨ آلے اداریں تے انٹیلی جنس اداریں کوں سمگلنگ روکݨ سانڳےھک ݙوجھے نال تعاون کرݨ ، سمگلراں اتے منشیات دے کاروبار اچ ملوث لوکاں کوں قرار واقعی اتے مثالی سزا ݙیواوݨ وزرات قانون و انصاف کوں ایں حوالے نال وختی ضروری قانون سازی دی ہدایت کیتی۔ وزیراعظم آکھیے ملک تے قوم دا پیسہ لٹݨ آلیں تے انہاں دے سہولت کاراں کوں قطعاً کہیں قسم دی رعایت نہ ݙتی ویسی ۔اجلاس اچ وزیرِاعظم کوں سمگلنگ، افغان ٹرانزٹ ٹریڈ دے غلط استعمال، منشیات، کھاوݨ پیوݨ دیاں چیزاں جیندے اچ کھنڈ ، کݨک ، کھاد، پٹرولیم مصنوعات، غیر قانونی اسلحے دے حوالے نال تفصیلی طور تے ݙسایا ڳئے ۔ اجلاس کوں افغان ٹرنزٹ ٹریڈ دے حوالے نال اے ڈی خواجہ دی سربراہی اچ بݨائی ڳئی تحقیقاتی کمیٹی دی رپورٹ وی پیش کیتی ڳئی۔ اجلاس اچ وفاقی وزراء سید محسن رضا نقوی، جام کمال خان، احد خان چیمہ، رانا تنویر حسین، ڈاکٹر مصدق ملک، اعظم نذیر تارڑ، چیئرمین ایف بی آر، اٹارنی جنرل، قانون نافذ کرݨ آلے اداریں تے انٹیلی جنس ایجنسیاں دے اہلکار و متعلقہ اعلیٰ حکام شرکت کیتی۔