اسٹیبلشمنٹ اتے عمران خان ڈیل دا علم کائنی ، کالے شیشے دے سارے پرمٹ منسوخ کریندے پیوں، وزیر داخلہ محسن نقوی

اسلام آباد۔29اپریل(اے پی پی):وفاقی وزیر داخلہ محسن نقوی آکھیے جو اسٹیبلشمنٹ اتے عمرا ن خان ڈیل دا علم کائنی ، ای سی ایل کمیٹی رولز دے تحت کجھ لوکاں دے ناں کڈھئن ، اے معمول دی کارروائی ہوندی اے ،غیر قانونی طور تے جاری تھیوݨ آلے کالے شیشے دے سارے پرمٹ منسوخ کریندے پیوں ۔ اسلام آباد ٹریفک پولیس اڄ توں پورے ملک دے کہیں وی حصے دے رہائشی  دا اسلام آباد توں ڈرائیونگ لائسنس دا اجرا کریسی ،  وفاقی دارالحکومت دے رہائشی 70 سال توں ودھ عمر دے لوکاں دا لائسنس انھاں دے گھر ونڄ تے بݨایا ویسی ۔ پاسپورٹ دے اجرااچ تاخیر دی مختلف وجوہات ہن ، پاسپورٹ اتھارٹی دے قیام دا حامی ہاں ، وختی وزارت داخلہ ایں حوالے نال قانون سازی کیتے ڈرافٹ متعلق وفاقی کابینہ کوں ݙسیسی ۔ اوہ سنوارکوں ایف نائن پارک اچ اسلام آباد ٹریفک پولیس دی طرفوں موبائل لائسنس و لرننگ  وینز ، ٹریفک پولیس ایجوکیشن سروس   دے اجرا دے موقع تے صحافیاں نال ڳالھ مہاڑ کریندے پئے ہن ۔ آئی جی اسلام آباد  ناصر رضوی  ، ایس ایس پی ٹریفک اتے ٻئے پولیس حکام  ایں موقع تے موجود ہن ۔  وزیر داخلہ ٹریفک پولیس دی طرفوں شروع کیتی ڳئی ݙوہیں سروسز دا  باقاعدہ افتتاح کیتا تے موبائل وین دا وی معائنہ کیتے۔  آئی جی اسلام آباد وفاقی وزیر داخلہ کوں  بریفنگ ݙتی۔ وزیر داخلہ محسن نقوی آکھیے اسلام آباد دے شہریاں کوں  ہر ممکن سہولتاں ݙیو میݙی اولین ترجیح اے۔ اڄ اساں کالجز اتے یونیورسٹیاں دے طالبیں کوں انہاں دے تعلیمی اداریں اچ ونڄ تے لرنر اتے لائسنس دے اجرا اتے تجدید دی سہولتاں ݙیوݨ دی سروس باقاعدہ شروع کریندے پیوں ۔ انہاں اعلان کیتے جو اڄ توں اسلام آباد ٹریفک پولیس 70 توں ودھ بزرگاں دے گھر ونڄ تے لائسنس بݨیسی ۔ اسلام آباد اچ ٹریفک  جام دی صورتحال دا وی پتہ اے ایں مسئلے کوں مکاوݨ سانڳے کجھ منصوبے وختی شروع کریندے پیوں ۔ اسلام آباد کوں منشیات اتے تجاوزات  توں پاک کرݨ دا کم شروع کرݙتا ڳئے ۔ تجاوزات متعلق  سپریم کورٹ دے فیصلے تے وی اسلام آباد  اچ من و عن عمل کریسوں ۔ کہیں کوں وی تجاوزات نہ کرݨ ݙیسوں ۔ انہاں آکھیے پولیس دے شہدا دےاہل خانہ تے پولیس دی ویلفیئر وی میݙی ترجیحات اچ شامل اے ۔ ترائے مہینے اچ اسلام آباددے سارے تھاݨیں دی صورتحال بدال تے ݙکھیساں۔