پنجاب ہتک عزت قانون 2024 صوبائی معاملہ، اپنا قانون منظور کرݨ پنجاب دا حق اے، وفاقی وزیر اطلاعات دا سینیٹ دی قائمہ کمیٹی اطلاعات و نشریات اچ ولدا

اسلام آباد۔6اگست(اے پی پی)وفاقی وزیر اطلاعات، نشریات، قومی ورثہ و ثقافت عطاء اللہ تارڑ آکھیے جو پنجاب ہتک عزت قانون 2024 صوبائی معاملہ اے، اپنا قانون منظور کرݨ پنجاب دا حق اے، او اسلام آباد اچ ایوان بالا دی قائمہ کمیٹی برائے اطلاعات و نشریات دے اجلاس اچ الیندے پئے ہن۔ اجلاس دی اڳواݨی کمیٹی چیئرمین سینیٹر سید علی ظفر کیتی۔ اجلاس اچ پرائیویٹ ممبر ”دی پروٹیکشن آف جرنلسٹس اینڈ میڈیا پروفیشنلز (ترمیمی) بل 2022“ تے غور تھیا۔ وفاقی وزیر آکھیا جو صحافیاں دے تحفظ بل کوں حتمی شکل ݙیوݨ اتے پارلیمنٹ توں منظوری سانڳے وزارت انسانی حقوق کوں خط لکھ ݙتے، جرنلسٹس پروٹیکشن کمیشن وزارت انسانی حقوق ہیٹھ کم کریندے، کمیشن کوں اپݨی وزارت دے تحت ڳھن آوݨ کیتے ساݙے کولو فنڈز موجود ہین، بل اچ منیجرز اتے سپروائزر نان جرنلسٹس کیٹیگری ڳݨیدن، انہان کوں قانون اچ رلا تے پڑھیا ویندے، کمیشن دے کمیشن دے چیئرپرسن دی تقرری دے طریقہ کار تے عمل کرݨ کوں وی تیار ہیں، کمیٹی معاملے سانڳے ویلھا مقرر کرے۔ اجلاس اچ پی ایف یو جے اراکین آکھیا جو مختلف قوانین اچ ”صحافیاں“ دی تعریف مختلف اے، ایکوں سارے قوانین اچ ہکو سوان کیتا ونڄے، بل اچ صحافیدں دے ذرائع دی حفاظت دیاں شقاں وی ہین۔ کمیٹی تفصیلی بحث دے بعد مزید غور کیتے بل آندے اجلاس تئیں موخر کر ݙتے۔ اجلاس اچ وزیر اطلاعات آکھیا جو ہتک عزت قانون بارے پنجاب حکومت ہک قانون پاس کیتے، ایندا اطلاق صرف پنجاب اچ تھی سڳدے، اتھاں ایندے تے بحث نئیں کیتی ونڄ سڳدی جو پنجاب دا حق اے کہ اہاپݨا قانون منظور کرے۔ وفاقی وزیر آکھیا جو فریقین دی صلاح نال ڈیجیٹل رائٹس پروٹیکشن اتھارٹی بل موخر کرݙتے ایندے تے کابینہ کمیٹی حتمی تجویزاں ݙیسی،”ایکس“ پلیٹ فارم تے ہر قسم دا مواد موجود اے، ڈیجیٹل ڈومین اچ جرائم تھیندے پن، لوکاں دا ڄیوݨ خطرے اچ اے، ڄیکر کہیں پوسٹ پاروں کہیں کوں کوئی نقصان تھیوے تاں ایندی اجازت نئیں ݙتی ونڄ سڳدی۔ کمیٹی معاشرے اتے اظہار رائے دی آزادی تے ہتک عزت قوانین دے اثرات تے بحث کیتے خصوصی اجلاس کرݨ دا فیصلہ کیتے۔ اجلاس اچ وفاقی وزیر اطلاعات و نشریات عطاء اللہ تارڑ، سینیٹر عرفان الحق صدیقی، سینیٹر پرویز رشید، سینیٹر سرمد علی، سینیٹر عون عباس، سینیٹر محمد طلال بدر، سینیٹر عبدالشکور خان، سینیٹر جان محمد، سینیٹر اشرف علی جتوئی، سینیٹر سلیم مانڈوی والا، سینیٹر زرقا سہروردی تیمور، سینیٹر منظور احمد کاکڑ شرکت کیتی۔ سیکریٹری وزارت اطلاعات و نشریات عنبرین جان، پرنسپل انفارمیشن آفیسر مبشر حسن اتے مختلف محکمیاں دے سینئر افسران وی موجود ہن۔