بانی چیئرمین پی ٹی آئی، شیخ مجیب کوں آپݨا ہیرو منیندے ہن ، شیخ مجیب دا ھک مجسمہ ڈھݨ نال انہاں آپݨا بیانیہ بدال ڳھدا، جیڑھا یو ٹرن نہ گھنے او بانی چیئرمین پی ٹی آئی اکھواہی نی سڳدا، عطاءاللہ تارڑ

اسلام آباد۔7اگست(اے پی پی) وفاقی وزیر اطلاعات، نشریات، قومی ورثہ و ثقافت عطاءاللہ تارڑ آکھیے بانی چیئرمین پی ٹی آئی شیخ مجیب کوں ہیرو منیندے ہن ، او اپݨا موازنہ شیخ مجیب نال کریندے ہن تے آکھدے ہن جو میݙے نال اوہو تھیندا پئے جیڑھا شیخ مجیب نال تھئے، شیخ مجیب دا صرف ھک مجسمہ ڈھݨ نال بانی چیئرمین پی ٹی آئی اپݨا بیانیہ بدال ڳھدے ، جیڑھا یو ٹرن نہ گھنے او بانی چیئرمین پی ٹی آئی اکھوا ہی نی سڳدا انہاں دا کوئی دین ایمان کائنی ، پاکستان دی حکومت اتے عوام بنگلہ دیش دے عوام نال کھڑن ، بنگلہ دیش دے لوکاں دے عزم اتے حوصلے کوں چنڳاں آکھدوں ، پارلیمان بالادست ادارہ اے، اینکوں قانون سازی دا اختیار اے، فلور کراسنگ دے حوالے نال آئین و قانون واضح ہن، تحریک انصاف دے آزاد ارکان ایجھی جماعت اچ رلیے جیں دا وجود ہی کائناں ہئی ، تحریک انصاف کوں بن منگیے ریلیف ݙتا ڳئے، فیصلے پاروں جیڑھی قانونی سقم اتے مسئلے بݨئن ، انھاں دا حل تھیوݨ ٻہوں ضروری اے۔ پی ٹی وی ہیڈ کوارٹرز اچ پریس کانفرنس توں خطاب کریندے وفاقی وزیر اطلاعات آکھیے مسلم لیگ (ن) دے بلال کیانی قومی اسمبلی اتے سینیٹر طلال چوہدری سینیٹ اچ الیکشن ایکٹ ترمیمی ٻل پیش کیتا، الیکشن ایکٹ دا ٻل قومی اسمبلی تے سینیٹ توں کثرت رائے نال منظور تھئے تے ایکٹ دی شکل اختیار کر ڳیا۔ انہاں آکھیے فلور کراسنگ دے حوالے نال آئین تے قانون واضح ہن جو فلور کراسنگ نی تھی سڳدی ، آزاد امیدوار کوں ترائے ݙینھ اچ کہیں وی پارٹی اچ رلݨا ہوندے بیان حلفی جمع کراوݨا پوندے، کیا بیان حلفی جمع کراوݨ دے بعد کہیں رکن دی پارٹی بدالی ونڄ سڳدی اے ؟ اے ٻہوں اوکھی صورت حال اے انہاں آکھیے ایں پرائیویٹ ممبر ٻل دے ذریعے ایں رول کوں قانونی شکل ݙتی ڳئی ۔ وفاقی وزیر آکھیے سپریم کورٹ دے ݙو معزز جج صاحبان اختلافی نوٹ اچ ٻہوں اہم نکتے چاتن تے آکھیے سپریم کورٹ دے فیصلے تے عمل درآمد کراوݨ سانڳے آئین دے آرٹیکل 51، 106، 62 اتے 63 کوں معطل کرݨا پوسی انہاں آکھیے سپریم کورٹ دے معزز جج صاحبان امین الدین خان اتے نعیم افغان اے سوال وی چاتے جو 15 ݙینھ گزرݨ دے باوجود تفصیلی فیصلہ کائنی آیا ۔ آئین اچ واضح اے جو کہیں وی سیاسی جماعت کوں متناسب نمائندگی دے فارمولے دے تحت مخصوص نشستاں ݙتیاں ویندن ، سنی اتحاد کونسل دا پارلیمان اچ کوئی وجود کائناں ہئی حالانکہ سنی اتحاد کونسل دے چیئرمین وی آزاد حیثیت نال الیکشن لڑیے۔ انہاں آکھیے تحریک انصاف دے ارکان ایم ڈبلیو ایم اچ  رل ویندے تاں شاید انہاں کوں مخصوص نشستاں مل ویندیاں ۔ وفاقی وزیر آکھیے او ایجھی پارٹی اچ رلئن جیں دا وجود ہی کائنی تے آکھدن جو متناسب نمائندگی دے فارمولے دے تحت نشستاں ݙتیاں ونڄن۔  ہر سیاسی جماعت مخصوص نشستاں سانڳے اپݨے امیدواراں دیاں لسٹاں شیڈول موجب لیندی اے تاں جو ووٹراں کوں ݙسایا ونڄ سڳے جو انہاں امیدواراں کوں چݨیے ، قانونی ماہرین موجب تحریک انصاف کوں بن منڳیے ریلیف ݙتا ڳئے تے ایجھے فریق کوں ریلیف ݙتا ڳئے جیڑھا ریلیف منڳݨ وی کائنی آیا ، پارلیمان بالادست ادارہ اے، اینکوں قانون سازی دا اختیار اے، پارلیمنٹ ھک رول کوں لاءدے اندر بدال تے اینکوں مزید دوام بخشیے ۔ انہاں آکھیے عدالت عظمیٰ دے فیصلے پاروں جیڑھے قانونی سقم اتے مسئلے پیدا تھئن انہاں دا حل ٻہوں ضروری اے ، اساں سمجھدوں قانونی معاملات اچ انصاف ہووݨا چاہیدے ۔ بنگلہ دیش دی صورتحال تے ڳالھ کریندے وفاقی وزیر اطلاعات آکھیے پاکستان دی حکومت اتے عوام بنگلہ دیش دے عوام دے رلے کھڑن، بنگلہ دیش دے لوکاں دا عزم اتے حوصلے کوں چنڳاں آکھدوں ۔ پی ٹی آئی رہنماواں ٹیلی ویژن تے آتے آکھیا ہئی جو ساݙا لیڈر شیخ مجیب وانڳوں اے ۔ جیڑھا یو ٹرن نہ گھنے او بانی چیئرمین پی ٹی آئی اکھو ہی نی سڳدا انہاں دا کوئی دین ایمان کائنی ، پی ٹی آئی ایں ملک اچ شیخ مجیب دا بیانیہ بݨایا، تحریک انصاف دے سوشل میڈیا دے آفیشل اکائونٹ توں شیخ مجیب کوں ہیرو ڈیکلیئر کیتا ڳیا تے عمران خان دا موازنہ شیخ مجیب نال کیتا ڳیا ۔ تحریک انصاف دی حکومت اتے شیخ حسینہ واجد دی حکومت اچ کجھ چیزاں ایہو سویاں ہن او وی ٻاہرلی مدد منگدیاں ہن تے اے وی ٻاہرلی مدد منگدے ہن انہاں وی آپݨے ملک اچ کرپشن کیتی تے انہاں وی 190 ملین پائونڈ دی کرپشن کیتی، ݙوہیں رلدے ملدن ، شیخ مجیب الرحمان دے ھک مجسمے کوں ڈھاوݨ تے انہاں آپݨا بیان بدال ڳھدے، اے او رجیم ہئی جیں بنگلہ دیش اچ ونڈ بݨائی ، بانی چیئرمین پی ٹی آئی وی ونڈ دے قائل ہن، اے سمجھدن جو ونڈ نال سیاسی فیدہ تھیندے ، قول و فعل دے تضاد اچ جے پی ایچ ڈی دی ڈگری ہوندی تاں او یو ٹرن دے بادشاہ کوں اعزازی طور تے ݙے ݙیوݨی چاہیدی اے ۔کیا وجہ اے بانی چیئرمین پی ٹی آئی ایں بیانیہ توں مکرݨ چاہندن جو شیخ مجیب اڄ انہاں دا ہیرو کائنی ، بی بی سی کرپشن دے معاملات رپورٹ کریندا پئے ، کیا تساݙے کرپشن دے معاملات ایں توں وکھرے ہن ، تساں وی ٻاہرلی مدد چاہندے ہاوے ، تساں وی چاہندے ہاوے جو معاشرے اچ مزید ونڈ پیدا کیتی ونڄےتساں اچ  شیخ حسینہ واجد اچ کوئی خاص فرق کائنی ، اڄ تساں شیخ مجیب دے بیانیہ توں یو ٹرن گھنسو تاں کیوں اڄ اے چںڳاں کائنی ، انہاں کوں جݙاں وی چنڳاں لڳسی تساں امریکہ تے الزام لا ݙیسو تے ول آکھسو جو فوج مدد کرے جݙاں چنڳاں لڳسی تساں 9 مئی دے حملے کروا ݙیسو ،بانی پی ٹی آئی ہر جاہ یو ٹرن گھندن ، اے ہمیشہ لاشاں دی ڳول اچ رہندن ۔ بانی پی ٹی آئی اپݨے کیساں دی ڳالھ کرن تے کیساں دا جواب ݙیون ، بیرسٹر گوہر کوں چاہیدے جو او آپݨے لیڈر نال ملاقات کرن تے انہاں کوں ݙساؤں جو تساں شیخ مجیب کوں ہیرو بݨیندے پئے ہاوے ہݨ بیانیہ بدل ڳئے۔ ول ول قول و فعل اچ تضاد، منافقت دی سیاست، کوڑ ، بہتان، الزام تراشی، غلط بیانی، فریب اتے مکر سارے رل ونڄن تاں ھک تحریک انصاف اتے بانی چیئرمین پی ٹی آئی بݨدے ۔ سوال دے جواب اچ وفاقی وزیر اطلاعات آکھیے بنگلہ دیش اچ معاشی حالات دا مسئلہ کائناں ہئی ، ونڈ ، کرپشن، نفرت اتے کوٹہ سسٹم دا مسئلہ ہئی۔ اساݙی خواہش اے بنگلہ دیش اچ حالات معمول تے آونڄن ، شیخ حسینہ واجد کوں ٻاہرلی مدد اتھوں ملدی ہئی جیں اڄ کشمیر تے ظلم ڈھا رکھئے۔ جݙاں شیخ مجیب دا بیانیہ بݨایا ویندا پیا ہئی تاں خان صاحب کوں اے نی ݙسایا ڳیا جو ایندی دھی کتھوں مدد منگدی پئی اے ۔چھوٹے چھوٹے سیاسی مفادات دی خاطر وݙے ترپے ماریے ویندن تے بعد اچ ایندی وݙی قیمت ݙیوݨی پوندی اے کوئی سیاسی جماعت یا لیڈر پاکستان توں وݙا کائنی ، میں سیاسی کارکن ہاں، ھک سیاسی جماعت دا رکن ہاں، میݙے ایمان دا حصہ اے جو پاکستان ہے تاں اساں ہیسے کݙاہیں اے نہ آکھساں جو فلاں کائنی تاں پاکستان کائنی ۔ جماعت اسلامی نال مذاکرات متعلق سوال دے جواب اچ وفاقی وزیر اطلاعات آکھیے جماعت اسلامی نال چنڳے طریقے معاملات اڳوں ودھئن ۔ گزریل ݙینھ مذاکرات اچ پیشرفت تھئی اے کجھ نکتے انہاں کوں بھڄوائن ، اڄ ول ایں تے مشاورت تھیسی ، کوشش اے اڄ مشاورت کوں چھیکڑی شکل ݙتی ونڄے ، جماعت اسلامی دا مطالبہ ساݙا ایجنڈا اے، اساں وی چاہندوں بجلی دے ٻل گھٹ ہوون ، آئی پی پیز دے معاملات تے نظرثانی ہووݨی چاہیدی اے ۔ 200 یونٹ استعمال کرݨ آلے بجلی صارفین کوں 50 ارب روپے دی سبسڈی ترائے مہینے سانڳے ݙتی ڳئی اے، امید اے جماعت اسلامی نال مذاکرات اچ چنڳی پیشرفت تھیسی بانی پی ٹی آئی آپݨی حکومت ختم کرݨ تے کݙاہیں امریکہ تے الزام لاتے تے کݙاہیں فوج تے ول آکھیے جو محسن نقوی انہاں دی حکومت ڈھائی ، بانی پی ٹی آئی کوں ذہنی چیک اپ دی لوڑھ اے ۔ شہنشاہ عالی دا فرمان اے جݙاں جیل دے سپرنٹنڈنٹ دے کمرے اچ موجود فریج توں پاݨی آندے تاں رستے اچ تتا تھی ویندے ، انہاں کوں انہاں دے سیل اچ ذاتی فریج ݙتی ونڄے۔انہاں آکھیے بانی پی ٹی آئی کنے فریج آڳئے ، سائیکل وی آ ڳئی اے، کھاوݨ پیوݨ چلدا پئے ، ہݨ پارٹی رہ ڳئی اے، ایندا وی مناسب انتظام گھنݨا چاہیدے