ملتان۔ 08 اگست (اے پی پی) ایڈیشنل چیف سیکرٹری جنوبی پنجاب فواد ہاشم ربانی آکھیے جنوبی پنجاب سیکرٹریٹ خطے دی تعمیر و ترقی اچ اہم کردار نبھیندا پئے،سارے چیمبرز آف کامرس اتے ٻئے سٹیک ہولڈرز نال رل تے جنوبی پنجاب دی ترقی دے سفر کوں تکھا کیتا ونڄ سڳدے، جنوبی پنجاب اچ آئی ٹی پارک بݨاوݨ سانڳے چنڳی کوشش کیتی ویسی ۔ اے ڳالھ انہاں ایوان صنعت و تجارت اچ منعقدہ تقریب توں خطاب اچ آکھی اے ۔ صدر ملتان چیمبر آف کامرس اینڈ انڈسٹریز میاں راشد اقبال اتے ٻئے ایگزیکٹیو ممبران ملتان چیمبر آف کامرس آوݨ تے ایڈیشنل چیف سیکرٹری جنوبی پنجاب دا شکریہ ادا کیتا۔ صدر ملتان چیمبر آف کامرس میاں راشد اقبال ایڈیشنل چیف سیکرٹری کوں تاجراں دے مسئلے ݙسائے جو بجلی دا ٹیرف گھٹ کرݨ تے کساناں کوں کھاد تے سبسڈی ݙیوݨ سانڳے حکومت کوں سفارشاں بھیڄاں ونڄن ،ایکسپورٹ تے سبسڈی بحال کیتی ونڄے ، ایگروبیسڈ انڈسٹری سانڳے سوکھے قرضے ݙتے ونڄن ،ملتان اچ سمال اتے میڈیم انڈسٹریز سانڳے ݙو نویں انڈسٹریل اسٹیٹس بݨائے ونڄن ، جنوبی پنجاب سیکرٹریٹ اچ محکمہ انڈسٹریز منتقل کیتا ونڄے ،ملتان اچ انڈسٹریل اتے آئی ٹی پارک سانڳے جاہ رکھی ونڄے ۔ایڈیشنل چیف سیکرٹری جنوبی پنجاب آکھیے جنوبی پنجاب ھک وکھڑی تہذیب و ثقافت تے روایات رکھݨ آلا خطہ اے تے اتھاں دے لوک صلح رکھݨ آلے تے ٻہوں ملنسار ہن،جنوبی پنجاب سیکرٹریٹ دے ایڈمنسٹریٹیو سیکرٹریز خطے دی تعمیر و ترقی سانڳے عملی کوششاں سودھے آپݨے متعلقہ محکمیں دی مانیٹرنگ وی کریندے پئن ،جنوبی پنجاب دے مسئلیں دے حل سانڳے سفارشات تیار کرتے حکومت پنجاب کوں بھجوائیاں ویسن ، خطے دی تعمیروترقی سانڳے ہر ممکن اقدامات چاتے ویندے پئن ، انہاں تاجربرادری دے مسئلیں دے حل سانڳے ہرممکن تعاون کرݨ دا یقین ݙویندے آکھیے تاجر تے صنعتکار معاشرے دا اہم طبقہ اے ،انھاں دے ٹیکساں توں ملکی معیشت دا پھیتا چلدے، جنوبی پنجاب دی تاجر برادری وی خطے دی تعمیر ترقی سانڳے کوشاں اے،سارے چیمبرز اتے سٹیک ہولڈرز نال رل تے خطے دی ترقی دے سفر کوں تکھا کیتا ونڄ سڳدے ۔ فواد ہاشم ربانی آکھیے جلال پور پیر والا اچ سپیشنل انڈسٹریل زون بݨاوݨ سانڳے 170 ایکڑ زمین الاٹ کیتی ڳئی اے ، بجلی دا ٹیرف اتے کھاد دی قیمت گھٹ کرݨ جݙاں جو جنوبی پنجاب اچ ݙو نویں انڈسٹریل اسٹیٹ بݨاوݨ سانڳے سفارشات صوبائی حکومت کوں بھیڄاں ویسن ، حکومت پنجاب شہراں اچ تجاوزات مکاوݨ سانڳے اسٹیرنگ کمیٹی بݨا ݙتی اے ، تجاوزات بارے روزانہ رپورٹ منگی ویسی ۔ایڈیشنل چیف سیکرٹری جنوبی پنجاب آکھیے جنوبی پنجاب سیکرٹریٹ اچ محکمہ صنعت منتقل کرݨ سانڳے حکومت کوں سمری بھیڄی ویسی ۔ انہاں آکھیے جنوبی پنجاب سیکرٹر یٹ مظفر گڑھ اتےملتان اچ دریائے چناب دے کنارے 100توں 200 ایکڑ رقبے امباں دے باغ لاوݨ دا پلان تیار کیتے ، جنوبی پنجاب اچ امب دے ودھارے سانڳے پرائیویٹ سیکٹر دی مدد نال امب دے ٻوٹے رادھے ویسن ، جنوبی پنجاب اچ تھیلی سیمیا دے مریضاں دی اوکھ پاروں ریجنل بلڈ سنٹر دے مالی مسئلے حل کیتے ویسن ،خطے دی تعمیر و ترقی سانڳے ہر ممکن اقدامات چاتے ویسن ۔
