سرمایہ کاری ہموار کرݨ تے غیر ملکی سرمایہ کاراں کوں مراعات  ݙیوݨ دیاں پالیسیاں بݨیندے پیوں ، وزیرخزانہ سینیٹرمحمداورنگزیب

اسلام آباد۔29اگست(اے پی پی) وفاقی وزیرخزانہ ومحصولات سینیٹرمحمداورنگزیب نجی شعبے دی سرمایہ کاری سانڳے سازگار ماحول بݨاوݨ سانڳے حکومت دے عزم دا اعادہ کریندے آکھیے سرمایہ کاری ہموار کرݨ تے غیر ملکی سرمایہ کاراں کوں مراعات  ݙیوݨ دیاں پالیسیاں بݨیندے پیوں۔ اے ڳالھ انھاں پاک برونائی انویسٹمنٹ کمپنی لمیٹڈ تے سعودی پاک انڈسٹریل اینڈ ایگریکلچرل انویسٹمنٹ کمپنی سودھے سانجھی سرمایہ کاری کمپنیاں دے نمائندیں نال جائزہ اجلاس دی صدارت کریندے آکھی، اجلاس اچ کمپنیاں دی پیشرفت، چیلنجز اتے مستقبل دے منصوبیں دا جائزہ ڳھدا ڳئے ۔ اجلاس اچ ݙوہیں کمپنیاں دی سینئر قیادت شرکت کیتی ۔ سی ای او پاک برونائی انویسٹمنٹ کمپنی لمیٹڈ (پی بی آئی سی ایل) کمپنی دے پورٹ فولیو اتے پاکستان اچ اہم اقدامات تے مختصر جائزہ پیش کیتا۔ انہاں وزیر خزانہ کوں پاکستان اتے برونائی وچال اقتصادی تعاون ودھاوݨ اچ پی بی سی آئی ایل دے کردار دا ݙسائے، انھاں آکھیے مالیاتی خدمات، رئیل سٹیٹ اتے ایس ایم ای دی مدد دے ذریعے صنعت اتے زراعت دے شعبیں اچ سرمایہ کاری دی سہولت ݙتی ڳئی اے ، کمپنی انھاں شعبیں اچ اہم پیشرفت کیتی اے ایندے نتیجے اچ ݙو پاسے تجارت تے اقتصادی استحکام کوں ودھارا ملدا پئے ۔ سی ای او سعودی پاک انڈسٹریل اینڈ ایگریکلچرل انویسٹمنٹ کمپنی ملک اچ اسلامی مالیات ، ڈیجیٹل فنانس، تجارت، زراعت اتے لائیو سٹاک دے ودھارے سانڳے کمپنی دے اہم ترقیاتی اقدامات اچ پریذنٹیشن وی ݙتی ۔ اجلاس اچ انھاں کمپنیاں دے آپریشنز دے مختلف پہلوواں بشمول سرمایہ کاری دی حکمت عملی، کارکردگی دی جانچ اتے کجھ رکاوٹاں تے ڳالھ مہاڑ کیتی ڳئی ۔ وزیر خزانہ ݙوہیں کمپنیاں دے کردار دی تعریف کیتی انھاں آکھیے کجھ سالاں اچ اہداف گھنݨ سانڳے سعودی عرب دا وژن 2030 لائق تحسین اے اتے پاکستان ایں سانڳے سعودی عرب دے تجربے توں فیدہ چاسڳدے،  حکومت نجی شعبے دی سرمایہ کاری سانڳے سازگار ماحول بݨاوݨ اچ پرعزم اے ، انھاں براہ راست غیر ملکی سرمایہ کاری گھن آوݨ اچ ݙوہیں کمپنیاں دے کردار تے منصوبیں دی اہمیت تے زور ݙتا ، انھاں آکھیے سرمایہ کاری دے عمل کوں ہموار کرݨ تے غیر ملکی سرمایہ کاراں کوں مراعات ݙیوݨ آلیاں پالیسیاں بݨائیاں ویندیاں پئن