دہشت گرداں نال مذاکرات دا سوال ہی نئیں ٻݨدا، صرف پاکستان دے آئین کوں منݨ اتے پرچم کوں سلام کرݨ آلیاں نال ہی ڳالھ تھیسی، وزیراعظم شہباز شریف

کوئٹہ۔29اگست(اے پی پی)وزیراعظم محمد شہباز شریف آکھیے جو دہشتگرداں کوں مکاوݨ پاکستان دی ترقی و خوشحالی دی کنجی اے، دہشت گرداں نال مذاکرات دا سوال ہی نئیں ٻݨدا، صرف پاکستان دے آئین کوں منݨ اتے پرچم کوں سلام کرݨ آلیاں نال ہی ڳالھ تھیسی۔ اے ڳالھ انہاں کوئٹہ اچ نیشنل ایکشن پلان دی صوبائی ایپکس کمیٹی دے اجلاس نال الیندے آکھی۔ وزیراعظم آکھیا جو صوبائی حکومت ڄیڑھا روڈ میپ ٻݨائے ایندے تے عملدرآمد دا ٻہوں وݙا فیدہ تھیسی، دہشت گرداں اتے ملک دشمناں کوں رعایت ݙیوݨ دا سوال ہی پیدا نئیں تھیندا، انہاں دے ناپاک عزائم مٹی اچ رلاوݨ اساں ساریاں دا قومی، سیاسی اتے دینی فریضہ اے، پاکستان دے آئین کوں منݨ اتے قومی پرچم کوں سلام کرݨ آلیاں نال الاوݨ ویلھے دہ وݙی لوڑھ اے ٻھل دہشت گرداں اتے آئین کوں منݨ آلیآں اچ فرق رکھݨ ضروری اے، دہشتگردی مکاوݨ کیتے وفاقی حکومت صوبائی حکومت دا پورا ہتھ ونݙیسی۔ انہاں آکھیا جو بلوچستان اچ بیورو کریسی لاوݨ بارے پالیسی آندی پئی اے، ایماندار اتے قابل آفیسران دا اپݨے اضلاع اچ ہووݨ ضروری اے، بیورو کریسی بلوچستان آوݨ توں کݙھویندی اے اتے بہانے ڳولیندی اے، اساں نے بلوچستان اچ اڄوکے واقعات دے بعد بیورو کریسی دی صوبے اچ تعیناتیاں تے الائے، ایں سانڳے پالیسی وی ٻݨائی اے جیندے تے صوبائی حکومت نال رل تے مکمل عملدرآمد کیتا ویسی اتے ایندے تے کوئی سمجھوتہ نہ کیتا ویسی، ایندے تے ساکوں ہک مٹھ تھیوݨا ہوسی۔ انہاں آکھیا جو 48 ویں کامن ٹریننگ پروگرام اچ شریک ادھے آفیسران دی فوری طور تے ہک سال کیتے بلوچستان اچ تعیناتی کیتی ویسی جیکوں سہ ماہی بنیاداں تے چار ایئر ٹکٹ ݙتے ویسن ڄݙاں جو انہاں کوں کارکردگی دی بنیاد تے 3 وادھو پوائنٹس وی ݙتے ویسن، 48 ویں کامن ٹریننگ پروگرام دے باقی آفیسران کوں چھی مہینے ڄݙاں جو تریڄھے مرحلے اچ اچ ہک سال بعد 49 ویں کامن ٹریننگ پروگرام دے آفیسران کوں ہک سال اتے ݙیݙھ سال بعد ایں گروپ دے باقی ادھے آفیسران کوں ہک سال کیتے بلوچستان اچ لایا ویسی اتے ایں پالیسی تے فوری عمل کریسوں اتے کوئی بہانہ قبول نا کیتا ویسی۔ انہاں آکھیا جو بیرور کریسی لاوݨ دے چنڳے اثرات نکلسن، چمن بارڈر تے پاسپورٹ سٹاف ݙوڑا کر ݙتے، ڈائریکٹر سائبر بلوچستان تیکھے لا ݙتا ویسی۔ انہاں آکھیا جو سماجی و ترقیاتی پروگرام وی ضروری اے، وزیراعلیٰ بلوچستان ڄیویں شفافیت نال کم کریندے پن ایندے نال تعمیر و ترقی دا انقلاب ڳھن آیا ونڄ سڳدے، بلوچستان دا احساس محرومی دور کرݨ کیتے 27 ہزار کلومیٹر شاہراہواں ٻݨائن، 2010ء اچ این ایف سی ایوارڈ اچ صوبہ بلوچستان دا حصہ ݙوڑا کیتے، سب توں ودھ پنجاب اپݨے حصے دا بجٹ بلوچستان کوں ݙتے، 14 سال اچ 160 ارب روپے اضافی بلوچستان کوں ملین، ترقیاتی منصوبیاں اچ شفافیت، چیک اینڈ بیلنس اتے تھرڈ پارٹی آڈٹ دی لوڑھ اے۔ انہاں آکھیا جو خیبرپختونخوا اتے بلوچستان اچ دشمنان پاکستان سی پیک، پاک۔دوستی اچ دراڑ سٹݨ چاہندن، بلوچستان دی ترقی و خوشحالی اچ رکاوٹ سٹیندے پن، گوادر بندرگاہ ترقی و خوشحالی دا بہترین منصوبہ اے، اتھاں دھرنے ݙتے ویندن اتے حملے کیتے ویندن، انہاں کوں ترقی و خوشحالی دا کوئی چنتا نئیں، ساݙا مقصد اے جو 50 فیصد درآمدات گوادر بندرگاہ توں تھیون تاں جو اے بندرگاہ فعال تھیوے، روزگار دے مواقع نکلن اتے پورے خطے اچ خوشحالی آوے۔ انہاں آکھیا جو ساکوں ہک مٹھ تھی تے دشمن مکاوݨے ہوسن۔ ٻاھرو شہ ݙیوݨ آلیاں دے منصوبے مٹی اچ رلیسوں، دہشت گردی دے خلاف پاکستان 80 ہزار جاناں ݙتن اتے 150 ارب ڈالر دا معاشی نقصان چاتے بدلے اچ پاکستان کوں صرف 20 ارب ڈالر ملین، اتنیاں قربانیاں کہیں ٻئے ملک نئیں ݙتیاں تہوں دہشت گردی دا خاتمہ تھئے اتے امن آئے، ساݙے عزم دی اتھو وݙی کوئی مثال نئیں ملدی۔ انہاں آکھیا جو ایپکس کمیٹی اجلاس دے مثبت اثرات آسن، اساں رل تے دہشت گردی مکاوݨی اے، ساݙا عزم اے جو سیاسی حکومت، افواج اتے صوبائی حکومتاں رل تے کم کریسن تاں ملک پرامن اتے خوشحال ہوسی۔