ملتان۔ 14 دسمبر (اے پی پی) ملتان تھاݨاں کینٹ پولیس نشتر ہسپتال توں اغوا تھیوݨ آلے ٻال کوں بازیاب کرا ڳھدے اتے اغوا کرݨ آلی تریمت گرفتار کر ڳھدے۔ ٻال کوں والدین دے حوالے کر ݙتا ڳئے۔ ترجمان پولیس دے مطابق 11 دسمبرکوں شام 7 وڄے دے نیڑے شہری عبد الستار پولیس کوں اطلاع ݙتی جو ہک نامعلوم تریمت اوندے ٻال ازادن کوں نشتر ہسپتال توں اغوا کر تے چا ڳئی اے۔ سی پی او ملتان صادق علی ڈوگر دے حکم تے ٻال کوں ڳولݨ کیتے ایس پی کینٹ جاوید طاہر مجید، اے ایس پی کینٹ ہالار خان چانڈیو،ایس ایچ او تھانہ کینٹ اتے افسراں دی خصوصی ٹیم ٻݨائی ڳئی۔ پولیس ٹیم سی سی ٹی وی فوٹیج،سوشل میڈیا اتے ٻئے تکنیکی وسائل استعمال کر تے ݙو ݙینھ اچ اغوا کرݨ آلی تریمت ملزمہ شمسہ ندیم کوں ٹریس کر تے گرفتار کیتے اتے اوندے قبضے توں نومولود ٻال کوں حفاظت بازیات کرا تے والدین دے حوالے کر ݙتا۔ اغوا کرݨ آلی تریمت ابتدائی تفتیش اچ منیا جو اوں اولاد نہ ہووݨ پاروں ٻال کوں گود ڳھنݨ کیتے اغوا کیتا۔ اغوا دے منصوبے اچ ہک نجی ہسپتال دی نامعلوم ڈاکٹر وی شامل اے۔
