احمدپورشرقیہ۔ 18 جنوری (اے پی پی) 20 ویں انٹرنیشنل چولستان ڈیزرٹ جیپ ریلی دے انتظامات بارے اعلیٰ سطحی اجلاس تھئے ۔کمشنر بہاول پور ڈویژن مسرت جبیں ٹریفک تے سکیورٹی پلان سودھے ٻئے انتظامات یقینی بݨاوݨ دی ہدایت کیتی ۔کمشنر بہاول پور ڈویژن مسرت جبیں آکھیے 20ویں انٹرنیشنل چولستان ڈیزرٹ جیپ ریلی دا میگا ایونٹ نہ صرف ملکی بلکہ بین الاقوامی سطح تے چولستان تے ایں خطے دے تاریخی تے ثقافتی ورثے کوں اجاگر کریسی ۔ ایونٹ اچ پاکستانی ریسرز دے علاوہ بین الاقوامی ریسرز دی شرکت ایں علاقے دے سافٹ امیج کوں دنیا اچ پیش کرݨ اچ معاون ثابت تھیسی ۔ اوانٹرنیشنل چولستان ڈیزرٹ جیپ ریلی ایونٹ دے انتظامات بارے اعلیٰ سطحی اجلاس دی صدارت کریندیاں پیاں ہن جیڑھی جو 12 توں 16 فروری 2025 تئیں چولستان اچ تھیسی ۔کمشنر مسرت جبیں ہدایت کیتی جو ریلی دے شرکاء اتے شائقین سانڳے عارضی خیمہ وستی، کھاوݨ پیوݨ دیاں سہولتاں ٻئے ضروری اقدامات وختی مکمل کیتے ونڄن تے ݙیراور فورٹ دے نیڑے سڑکاں دی مرمت دا کم وختی مکمل کیتا ونڄے ، انہاں آکھیے چولستان ڈیزرٹ ریلی دے نال ھک کلچرل فیسٹیول دا انعقاد کیتا ویسی ۔ کمشنر بہاول پورڈویژن مسرت جبیں آکھیے ریلی دے مو قع تے ٹریفک اتے سکیورٹی پلان سودھے ٻئیاں سہولتاں سانڳے وختی انتظامات یقینی بݨائے ونڄن ۔ اجلاس اچ آرپی او بہاول پوررائے بابر سعید، ڈپٹی کمشنر بہاول پور ڈاکٹر فرحان فاروق، ڈی پی او بہاول پور اسد سرفراز خان اتے ایم ڈی چولستان ڈویلپمنٹ اتھارٹی طارق محمود بخاری شریک تھئن۔ ایں توں انڄ ڈپٹی کمشنر رحیم یارخاں، ڈی پی او رحیم یارخاں، ڈپٹی کمشنر بہاول نگر، ڈی پی او بہاولنگر اتے متعلقہ تحصیلاں دے اسسٹنٹ کمشنرز شریک تھئن ۔اجلاس اچ ایڈیشنل کمشنرعامر کھچی، جی ایم ٹی ڈی سی پی نعمان خان، منیجر ٹی ڈی سی پی نعیم اقبال بیگ بریفنگ ݙتی۔
