اسلام آباد۔16فروری (اے پی پی) چیف آف آرمی سٹاف جنرل سید عاصم منیر آکھیا جو جئیں تئیں قوم پاک فوج دے پچھوں کھڑی اے انشاء اللہ پاک فوج کوں کوئی نی ہرا سڳدان، خوارج سویں گمراہ گروپ کوں کݙاہیں وی پاکستان اچ آپݨی اقدار مسلط کرݨ دی موکل نہ ݙیسوں، لڑدیں ویلھے پختون، بلوچی یا پٹھان دی کوئی تفریق نی ہوندی بلکہ اساں ساتھیاں وانڳ لڑدوں کیونجو اساں کیتے پاکستانیت سارا کڄھ اے۔ خارجی اسلام دی غلط تشریح کریندے پئن جو اسلام اچ جائز کائنی۔ پاک فوج فتنہ الخوارج دے خلاف لڑدی پئی اے، قرآن پاک اچ وی اللہ اتے اوندے رسول ﷺ نال جنگ کرݨ آلیاں دے خلاف جہاد دا حکم ݙتا ڳئے۔ انہاں بارے آخرت اچ وی سخت عذاب دی وعدی اے۔ اسلام دنیا دا ہکو اتے پہلا مذہب اے جئیں تریمت کوں عزت ݙتی اے۔ اے ڳالھیں انہاں طلبا نال خصوصی ڳالھ مہاڑ کریندیں ہوئیں آکھی۔ انہاں آکھیا جو ملک دے نینگراں نال ڳالھ مہاڑ کر تے خوشی تھئی اے۔ جئیں تئیں قوم پاک فوج دے پچھوں کھڑی اے انشاء اللہ پاک فوج کوں کوئی نی ہرا سڳدان، خوارج سویں گمراہ گروپ کوں کݙاہیں وی پاکستان اچ آپݨی اقدار مسلط کرݨ دی موکل نہ ݙیسوں۔ آرمی چیف آکھیا جو انہاں بارے اللہ تعالیٰ دے احکامات اے ہن جو ’’ جو اللہ اتے رسولﷺ نال جنگ کریندن اتے زمین تے فساد پیندن انہاں کوں قتل کر ݙیو”۔ انہاں قرآن پاک دی آیات دا حوالہ ݙیندیں ہوئیں آکھیا جو قرآن مجید اچ فرمایا ڳئے جو ” انہاں کوں پھانسی تے لٹکا ݙیو، یا مختلف سمتاں توں انہاں دے ہتھ پیر کٹ ݙیو، یا آپݨی زمین توں انہاں کوں دربدر کر ݙیو” اے انہاں کیتے دنیا دے اندر سزا اے اتے آخرت اچ انہاں کوں وݙا عذاب ݙتا ویسی۔ جنرل سید عاصم منیر خوارج کوں مخاطب کریندیں ہوئیں آکھیا جو آپݨے آپ کوں ریاست دے سامھے سرنڈر کر ݙیون، تاں او ریاست توں رحم دی توقع کر سڳدن۔ جنرل سید عاصم منیر آکھیا جو اساں ایں قسم دے گمراہ گروپ کوں کݙاہیں وی آپݨے ملک تے آپݨی اقدار مسلط نہ کرݨ ݙیسوں۔
