پرتگال دے سفیر دی مینجنگ ڈائریکٹر اے پی پی نال ملاقات، خبراں دے تبادلے سانڳے تعاون تے الایا

اسلام آباد۔25فروری(اے پی پی)پاکستان اچ پرتگال دے سفیر فریڈریکو سلوا قومی خبر رساں ادارے ایسوسی ایٹڈ پریس آف پاکستان (اے پی پی) دے مینیجنگ ڈائریکٹر محمد عاصم کھچی نال ملین اتے ݙوہاں ملکاں دے سرکاری خبررساں اداریاں وچال خبراں دے تبادلے سانڳے تعاون تے ڳالھ مہاڑ کیتی۔

پرتگال دے سفیر ݙوہاں ملکاں وچال تعلیم، فن و ثقافت، سیاحت، کاروبار اتے ایسوسی ایٹڈ پریس آف پاکستان (اے پی پی) اتے پرتگال دی قومی خبررساں ایجنسی “لوسا” وچال خبراں دے تبادلے دے معاہدے سودھا کئی شعبیاں اچ ڳانݙھا ودھاوݨ دا آکھیا۔ سفیر فریڈریکو سلوا آکھیا جو اے میڈیا اتے انفارمیشن ٹیکنالوجی دا دور اے اتے ݙوہاں سرکاری خبررساں اداریاں کوں اینڄھیاں خبراں اتے معلومات سانڳے تعاون کرݨا چاہید جیڑھا ݙوہاں ملکاں کیتے فیدہ مند ہووے، ݙوہاں ملکاں کولو عوامی روابط ودھاوݨ سودھا ہک ٻئے نال شیئر کرݨ دے ودھ مواقع ہین، ݙوطرفہ مواصلاتی رابطے، میڈیا، ثقافت، کاروبار، سیاحت سودھا مختلف شعبیاں اچ مستقبل دے روابط دی راہ ہموار کریسوں جیندے نال ݙوہاں اقوام کوں ٻیا نیڑے ڳھن آیا ونڄ سڳے۔

ملاقات اچ اے پی پی دے مینیجنگ ڈائریکٹر محمد عاصم کھچی پرتگالی سفیر کوں یقین ݙیوایا جو ݙوہاں ملکاں دے عوام دے فیدے کیتے خبراں دے شعبے اچ تعاون سانڳے مفاہمت دی یادداشت تے دستخط دا عمل تیز کیتا ویسی۔ سفیر فریڈریکو سلوا نال پرتگالی مصنفہ اتے صحافی ٹیریسا نکولائو وی ہن جیڑھے 22 توں 27 فروری تئیں پاکستان دے دورے تے ہین۔

ایں موقع تے ٹیریسا نکولائو پاکستان اچ مصروفیات بارے ݙسایا جو او پاکستان اچ بہترین جھٹ گزرینداں پن، انہاں لاہور اچ ہک ادبی میلے اتے اسلام آباد اچ ٻیاں تقریبات اچ شرکت کیتی اے۔ انہاں پاکستان دی متنوع اتے بھرپور ثقافت، مصالحہ دار و  لذیز روایتی کھاوݨیاں دی وݙی تعریف کیتی۔ ٹیریسا نکولائو پاکستان دے متنوع ثقافتی و ادبی ورثے دی اہمیت اڳونہی کریندے ثقافت نال ݙوہاں ملکاں وچال عوام کوں جوڑݨ کیتے کٹھیاں کوششاں کرݨ تے زور ݙتے۔