بہاول پور 05 مارچ (اے پی پی) بہاول پور اچ چاہ ٻݨاوݨ کیتے ٻالی ڳئی ٻھاہ جھونپڑی کوں لڳݨ پاروں چار معصوم ٻال سڑ تے جاں بحق تھی ڳئے۔ موگہ قاسم والا بنگلہ تحصیل یزمان علاقہ پولیس تھانہ ڈیراوراچ چوہدری بلال نامی بندے کنے کماد دی کٹائی دے سلسلے اچ ضلع راجنپور توں مزدور پیشہ وار لوک آتے جھونپڑی اچ رہندے پئے ہن۔ گزریل ݙینھ 55 سالہ تریمت نذیراں مائی چاہ ٻݨاوݨ کیتے ٻھاہ ٻالی، غفلت پاروں جھونپڑیاں کوں ٻھاہ لڳ ڳئی جئیں اچ زد اچ آتے چار معصوم ٻال آڳئے جئیں اچ 2سالہ بلال،ہک سالہ مقدس ،4سالہ علیزہ اتے 3سالہ شبانہ سڑ تے موقع تے جاں بحق تھی ڳئے جڈانجو تریمت وی زخمی تھی ڳئی۔ اطلاع ملݨ تے مقامی پولیس اتے ریسکیو 1122 موقع تے پڄ ڳئی جنہاں قانونی کاروائی شروع کیتی اتے لواحقین نعشاں کوں ڳھن تے آپݨےعلاقے راجن پور واپس چلیے ڳئے۔
