اسلام آباد۔7اپریل (اے پی پی) وفاقی وزیر اطلاعات و نشریات عطاءاللہ تارڑ آکھیے کھیݙاں دے میدان آباد رکھݨ سانڳے حکومت بھرپور کوششاں کریندی پئی اے ، سیاست کوں کھیݙاں توں ھک پاسے رکھݨا چاہیدے ، نینگراں اچ مثبت سرگرمیاں دا ودھارا ساݙی ترجیح اے، حکومت نینگراں کوں اڳوں ودھݨ دے مسلسل موقع ݙیندی پئی اے ، پی ایس ایل توں قوم کوں چنڳی کرکٹ ݙیکھݨ کوں ملسی ۔ نیشنل کرکٹ گرائونڈ اچ رسجا الیون اتے یو کے میڈیا وچال فرینڈلی میچ اچ بحیثیت مہمان خصوصی شرکت دے موقع تے میڈیا نال ڳالھ مہاڑ کریندے وفاقی وزیر اطلاعات میچ دے سارے آرگنائزرز کوں مبارخ ݙتی تے آکھیے کھیݙ دیاں سرگرمیاں تھیوݨ چنڳی ڳالھ اے ۔کھیݙاں دیاں سرگرمیاں جتنی زیادہ ہوسن معاشرے اچ اتنی بہتری آسی تے مثبت رویے کوں ودھارا ملسی ، صحت مند سرگرمیاں توں کھیݙ کرکٹ اتے سپورٹس مین کوں ودھارا ملسی ۔ ھک سوال دے جواب اچ وفاقی وزیر آکھیے ہر جت کھیݙ دا حصہ ہوندن ، پاکستان کرکٹ ٹیم اچ ٻہوں ٹیلنٹ موجود اے، اساکوں پر امید رہݨا چاہیدے ، پاکستان کرکٹ ٹیم وݙے وݙے معرکے سر کیتن ، ان شاءاللہ بہتری تھیسی ۔ ھک ٻئے سوال تے وفاقی وزیر اطلاعات آکھیے اسلام آباد اچ انٹرنیشنل کرکٹ سٹیڈیم ضرور ہووݨا چاہیدے ایں تے پلاننگ جاری اے۔ عطاءاللہ تارڑ آکھیے مسلم لیگ (ن) اپݨے دور حکومت اچ ٹیلنٹ ہنٹ پروگرام شروع کیتا، ایں اچ اساکوں ٻہوں کھلاڑیاں دی سپورٹ رہی اے، مسلم لیگ (ن) دے قائد نواز شریف دے دور اچ شروع تھیوݨ آلے پرائم منسٹر یوتھ پروگرام کوں وزیراعظم شہباز شریف اڳوں ودھیندے پئن ، پورے پاکستان دے ٹیلنٹ کوں سامݨے گھن آوݨ سانڳے وݙا فعال کردار ادا کیتا ویندا پئے ۔ حکومت نینگراں کوں اڳوں ودھݨ دے موقع ݙیندی پئی اے ، سیاسی جماعتاں، پرائیویٹ اتے پبلک سیکٹر کوں رل تے کھیݙاں دے ودھارے سانڳے ٹیلنٹ ہنٹ سانڳے کم کرݨا چاہیدے ۔ دنیا بھر اچ ساݙے سپورٹس مین اپݨا ناں بݨیندے پئن ، جیولین تھرور ارشد ندیم پوری دنیا اچ اپݨا سکہ منوائے ، اساں کنے ٹیلنٹ موجود اے، اے ٹیلنٹ یوتھ فیسٹیول توں سامݨے آئے، ایں فیسٹیول اچ ہر طرح دے کھیݙاں کوں رلایا ڳئے ۔ جݙاں ایہو سویں ایونٹس کیتے ویندن تاں کھلاڑیاں دیاں صلاحیتاں اجاگر تھیندن تے انہاں کوں عالمی سطح تے پرفارم کرݨ دا موقع ملدے ۔ وفاقی وزیر آکھیے مزید ٹیلنٹ ہنٹ اتے یوتھ فیسٹیول کرائے ویسن تاں جو ارشد ندیم جیھے مزید کھلاڑی سامݨے آون، ہاکی کوں ونڄا مقام واپس ملے کھیݙاں دا ودھارا ساݙی اولین ترجیح اے ھک سوال دے جواب اچ انہاں آکھیے دنیا اچ سٹیڈیمز کوں ایسوسی ایشن دے ذریعے چلاوݨ دا ماڈل اے، کوشش ہوسی ایں دا کوئی حل نکلے ، ڈیپارٹمنٹل سپورٹس کوں بحال کیتا ویندا پئے ، ماضی اچ ڈیپارٹمنٹل سپورٹس ختم تھیوݨ توں ٻہوں سارے کھلاڑی بےروزگار تھی ڳئےجݙاں ساݙی ہاکی ٹیم ایشیا کپ اچ چنڳی پرفارمنس دے بعد واپس آئی تاں وزیراعظم اے سلسلہ ول شروع کیتا سپورٹس ڈیپارٹمنٹ کوں آکھیا ڳئے ماضی دے کھلاڑیاں تے وی ایندا اطلاق تھیوے، ڈیپارٹمنٹل سپورٹس توں وݙے کھلاڑی پیدا تھئن ، پی ٹی وی کرکٹ ٹیم دی سلیکشن میرٹ تے تھئی، شمائل حسین شاندار کارکردگی ݙکھائی ، پہلی واری تھئے ٹیم اچ رلݨ سانڳے کوئی پرچی نی چلی ، پی ٹی وی دی مالی صورتحال ٻہوں چینلزتوں چنڳی اے اساں چیمپئنز ٹرافی اتے ورلڈ کپ براہ راست ݙکھائے، پی ایس ایل اچ پوری دنیا دے کھلاڑی آندن تے پوری پاکستانی قوم کوں کرکٹ اتے آپݨے پسند دے کھلاڑی ایکشن اچ ݙیکھݨ دا موقع ملدے ، پی ایس ایل اچ مسابقتی کرکٹ تھیسی تے اے پاکستان تے کرکٹ دی جت ہوسی۔
