اسلام آباد۔8اپریل(اے پی پی) وفاقی وزیر تجارت جام کمال خان آکھیے حکومت دی طرفوں معدنیات دے ودھارے تے ٻاہرلے سرمایہ کاراں کوں سݙݨ تے انہاں کوں کاروبار اچ سوکھ ݙیوݨ نال ملکی معیشت تے مثبت اثرات پمسن ۔ ٻہوں سارے ملک پاکستانی معدنیات دے شعبے اچ سرمایہ کاری کر چکئن تے او ٻہوں مطمئن ہن۔اے ڳالھ انہاں پاکستان منرل انویسٹمنٹ فورم 2025 توں خطاب کریندے آکھی ۔ انہاں آکھیے ایں فورم اچ شرکت کرݨ آلیں کوں خوش آمدید آکھدوں ، حکومت پاکستان دی طرفوں معدنیات دے ودھارے تے ٻاہرلے سرمایہ کاراں کوں سݙݨ تے سرمایہ کاراں کوں کاروبار اچ سوکھ ݙیوݨ نال ملکی معیشت تے چنڳے اثرات پمسن ۔ انہاں آکھیے پاکستان اچ ٻہوں سارے ملک معدنیات دے شعبے اچ سرمایہ کاری کرچکن تے او آپݨی سرمایہ کاری دے حوالے نال مطمئن ہن، ٻئے ملکاں کوں وی ایں شعبے اچ سرمایہ کاری سانڳے خوش آمدید آکھدوں تے وعدہ کریندوں اساں انہاں نال چنڳاں تعاون کریسوں ، بلوچستان اچ معدنیات اتے ٻئے شعبیں اچ ٻہوں سارے ملک سرمایہ کاری کر چکئن تے حکومت انھاں دی چنڳی حمایت جاری رکھی ہوئی اے ۔ جام کمال خان آکھیے بلوچستان اتے پاکستان دے شمالی علاقیں توں مختلف قسم دی تقریباً 90 معدنیات ڳھدیاں ویندیاں پئن ، ایں شعب کوں مزید سرمایہ کاری دی لوڑھ اے کیوں جو جیولوجیکل سروے موجب پاکستان منرلز توں مالامال اے اتے ایں اچ بے شمار معدنیات موجود ہن جیڑھا جو کوالٹی دے اعتبار توں وی ٻئے ملکاں دی نسبت زیادہ بہتر ہن انہاں آکھیے اساں چاہندوں مزید بین الاقوامی کمپنیاں پاکستان دے یں شعبے اچ سرمایہ کرتے ایں شعبے دی صلاحیتاں توں فیدہ چاون ۔ وزیر تجارت آکھیے پہلے توں پاکستان اچ معدنیات دے شعبے اچ سرمایہ کاری کرݨ آلیاں کمپنیاں آپݨے آپریشنز کوں وسعت ݙیوݨ چاہندن تے ایں وچ سرمایہ کاری ودھیندیاں پئن جام کمال آکھیے پاکستان دے 95 فیصد وسائل حالی تئیں دریافت نی کیتے ونڄ سڳیے اساں چاہندوں جو دنیا آوے اتے انھاں وسائل کوں دریافت کرݨ دے نال موثر طور تے استعمال وی کرے۔ انہاں آکھیے پاکستان اچ لیتھیئم ، کاپر ، سلور ، سونے ، چاندی ، ایلومینیئم اتے ٻئی دھاتاں دے وسیع ذخیرے موجود ہن ،پاکستان بین الاقوامی سرمایہ کاراں سانڳے محفوظ ملک اے جئیں دا ثبوت اتھاں موجود سینکڑاں بین الاقوامی کمپنیاں ہن تے آپݨے آپریشنز کوں جاری رکھݨ دے نال ایں کوں ودھاوݨ دی چاہندن ، پاکستان خطے دے انھاں ملکاں توں ہے جتھاں کارپوریٹ سیکٹر سرمایہ کاری کرݨ چاہندے تے حکومت پاکستان وی نجی سرمایہ کاراں دی ہمیشہ توں حوصلہ افزائی کریندی آندی اے۔
