پاکستان منرلز سمٹ دی کامیابی نال مقامی سرمایہ کاراں دی وݙے منصوبیاں اچ دلچسپی ودھی اے، وزیرخزانہ دا اجلاس نال خطاب

اسلام آباد۔14اپریل (اے پی پی)وفاقی وزیر خزانہ و محصولات سینیٹر محمد اورنگزیب آکھیے جو برآمدات ودھاوݨ اتے اقتصادی سرگرمیاں اچ تیزی کیتے بینکنگ دے شعبہ دا کردار اہم اے، پاکستان منرلز سمٹ دی کامیابی نال مقامی سرمایہ کاراں دی وݙے منصوبیاں اچ دلچسپی ودھی اے۔ انہاں اے ڳالھ ترجیحی شعبیاں کوں قرضیاں دی فراہمی بارے اعلیٰ سطح اجلاس دی صدارت کریندے آکھی۔ اجلاس اچ سٹیٹ بینک آف پاکستان، پاکستان بینکس ایسوسی ایشن اتے ملک دے سرکردہ بینکاں دے نمائندگان شرکت کیتی۔ اجلاس دا مقصد مالیاتی شعبے کوں حکومت دے برآمدات تے مبنی معاشی بحالی اتے مستقبل دی ترقی دے ایجنڈے نال ہم آہنگ کرݨا ہا۔ وزیر خزانہ آکھیا جو حکومت براہ راست غیر ملکی سرمایہ کاری سانڳے سنجیدگی نال اقدامات کریندی پئی اے تاں جو کلیدی شعبیاں اچ قابل برآمد اضافی پیداواری صلاحیت پیدا کیتی ونڄے، ایں سال ویلھے توں پہلے بجٹ سازی دا عمل شروع کیتے جو ایں سانڳے زمینی حقائق دے مطابق تجاویز ڳھدیاں ونڄن، حکومت دا مقصد دیرپا سرمایہ کاری تے مبنی اتے برآمدات نال جڑی ترقی اے۔