وزیراعظم دی اڳواݨی اچ لائیو سٹاک شعبے دیاں اصلاحات بارے اعلیٰ سطح جائزہ اجلاس

اسلام آباد۔5 اکتوبر(اے پی پی)وزیراعظم محمد شہباز شریف لائیو سٹاک شعبے دی برآمدات ودھاوݨ کیتے ٻاھروں منگوائے ڳئے ݙنگراں کوں خصوصی ٻھاݨیاں اچ پال تے برآمد کرݨ، لائیو سٹاک دے شعبے کوں کارپوریٹ بنیاداں تے ودھاوݨ اتے نجی شعبے دے ماھرین دے ونݙارے اصلاحات دی تیاری اتے نفاذ دی منظوری ݙتی اے۔ انہان اے منظوری لائیو سٹاک شعبے دیاں اصلاحات بارے اسلام آباد اچ تھیوݨ آلے اعلیٰ سطح جائزہ اجلاس دی اڳواݨی کریندے ݙتی۔ اجلاس چ لائیو سٹاک شعبے تے تفصیلی بریفنگ ݙتی ڳئی۔ اجلاس اچ لائیوسٹاک شعبے دی ترقی اتے برآمدات ودھاوݨ کیتے لائحہ عمل اتے تجاویز وی ݙسیاں ڳئن۔ وزیراعظم لائیو سٹاک اچ بیماریاں مکاوݨ کیتے وزارتِ قومی غذائی تحفظ کوں صوبائی حکومتاں نال مل تے کم کرݨ دی ہدایت کریندے آکھیے جو گوشت تے لائیو سٹاک دی برآمدی صنعت دی ودھ ترقی کیتے پوری ویلیو چین دی بہتری تے کم کیتا ونڄے۔ وزیراعظم گوشت، لائیو سٹاک اتے ایںدے نال جڑیاں برآمدات دے اہداف طے کر تے پیش کرݨ دی وی ہدایت کیتی اے۔ انہاں خصوصی فارم ہاؤسز اچ اعلیٰ نسل دے ودھ پیداوار والے ݙنگر پالݨ، درآمدی ڈیوٹی مکاوݨ، ݙنگراں دی ٹیگنگ دا جدید نظام متعارف کراوݨ دی ہدایت کیتی جو لائیو سٹاک شعبے کوں جدید ٻݨاوݨ کیتے کارپوریٹ طرز تے تنظیمِ نو کیتی ونڄے۔ وزیر اعظم آکھیا جو ملکی زرعی شعبے دا 60 فیصد توں ودھ لائیو سٹاک ہین، شعبے اچ برآمدات دی ݙاݙھی صلاحیت اے، ملک توں منہ کھر دی بیماری مکاوݨ کیتے مقررہ اہداف نال لائحہ عمل آندے ݙو ہفتیاں اچ ٻݨا تے ݙتا ونڄے۔ انہاں ملک بھر اچ مذبحہ خانیاں دی بین الاقوامی سرٹیفیکیشن کرݨ، انہاں کوں عالمی معیار دے مطابق ٻݨاوݨ کیتے تھرڈ پارٹی ویلیڈیشن یقینی ٻݨاوݨ دی ہدایت کیتی۔ اجلاس اچ لائیو سٹاک تے گوشت دی برآمدات ودھاوݨ کیتے حکومتی اقدامات دا وی ݙسایا ڳیا جیندے اچ قومی پروگرام برائے حیوانی بیماریاں دی نگرانی، انہاں توں تحفظ تے جانوراں دی ٹریس ایبلٹی، منہ کھر دی بیماری توں پاک زونز تے کمپارٹمنٹس دا قیام، ویکسینیشن تے بیماریاں دی ڈیجیٹل نگرانی، ایکسپورٹ گریڈ فارمز تے بین الاقوامی صحت و حلال سرٹیفیکیشن دا نظام شامل اے۔ اجلاس کوں ݙسایا ڳیا جو حکومت فیڈ لاٹ فارمنگ، کولڈ چین، ڈی-بوننگ، ویلیو ایڈڈ مصنوعات تے برآمدی انفراسٹرکچر کوں فروغ ݙیوݨ تے وی توجہ ݙیندی پئی اے۔ 2028ء تئیں گوشت دی برآمدات یاں ودھاوݨ دا ہدف رکھیا ڳئے۔ اجلاس اچ وفاقی وزراء رانا تنویر حسین، احسن اقبال، ڈاکٹر مصدق ملک، احد خان چیمہ، محمد اورنگزیب، عطاء اللہ تارڑ، مشیرِ وزیراعظم ہارون اختر، وزیرِ مملکت بلال اظہر کیانی تے متعلقہ اعلیٰ حکام شرکت کیتی۔