پاکستان معاشی و اقتصادی پالیسیاں سانڳے موسمیاتی و ماحولیاتی تبدیلی نال نمٹݨ کیتے پرعزم اے، وزیرخزانہ محمداورنگزیب

اسلام آباد۔23اپریل(اے پی پی)وفاقی وزیر خزانہ سینیٹر محمد اورنگزیب  آکھیے جو پاکستان موسمیاتی و ماحولیاتی تبدیلی نال نمٹݨ کیتے ودھ اقدامات کریندا پئے، موسمیاتی و ماحولیاتی اقدامات دے پہلواں کوں معاشی و مالیاتی پالیسیاں نال ڄوڑݨ ٻہوں ضروری تھی چکیے۔ اے ڳالھ انہاں واشنگٹن ڈی سی اچ عالمی بینک اتے بین الاقوامی مالیاتی فنڈ دے موسم بہار دے سالانہ اجلاس ویلھے موسمیاتی اقدامات بارے وزرائے خزانہ دے اتحاد دے 13ویں وزارتی اجلاس نال خطاب اچ آکھی۔ اجلاس اچ محدود مالی وسائل اتے بدلدے سیاسی حالات سانڳے موسمیاتی و ماحولیاتی تبدیلی نال نمٹݨ اتے اقتصادی ترقی دے امور تے غور تھیا۔

وزیرخزانہ پاکستان ولوں ماحولیاتی و موسمیاتی تبدیلی دے چیلنجز نال نمٹݨ کیتے اقدامات دا ݙسایا اتے ماحولیاتی مسائل دے موثر حل سانڳے پاکستان اچ ٻݨیے کلائمیٹ پراسپیرٹی پلان اتے کلائمیٹ فنانس سٹریٹجی دی تفصیل ݙسائی۔ انہاں پاکستان اتےعالمی بینک وچال 10 سالہ کنٹری پارٹنرشپ فریم ورک اچ ماحولیاتی امور کوں رلاوݨ دا وی ݙسایا جیندے تحت پاکستان اچ ماحولیاتی و موسمیاتی لچک اتے کاربن دے اخراج اچ کمی ڄھیں پہلواں تے زور ݙتا ڳئے۔ انہاں آئی ایم ایف نال مالی اتسحکام سانڳے معاملات تے وی ڳالھ کیتی۔